Ռուսաստանը Մինսկի խմբի համանախագահությունում նշանակում է նոր համանախագահ: Իգոր Պոպովին կփոխարինի Իգոր Խովաևը: Նա արդեն անցել է ճանաչողական աշխատանքի ու եղել Բաքվում, հանդիպել արտգործնախարար Բայրամովի հետ: Խովաևը անկասկած կլինի նաև Երևանում, իսկ ահա հարցը, թե կունենա՞ արդյոք հանդիպում պաշտոնական Ստեփանակերտի հետ՝ բաց է: Ընդ որում, բաց է ոչ միայն Ստեփանակերտ այցելելու առումով, այլ թեկուզ Երևանում Արցախի պաշտոնական ներկայացուցչի հետ հանդիպում կազմակերպելու:
Իգոր Խովաևը ՄԳԻՄՕ-ավարտ դիվանագետ է, որը Ռուսաստանի արտգործնախարարության համակարգում հիմնականում աշխատել է ասիական ուղղությամբ: Այն, որ Մոսկվան փոխարինում է համանախագահին, իհարկե նշան է, որ Մինսկի խմբի համանախագահության ձևաչափի «մահվան» մասին լուրերը չափազանցված են, թեև, իհարկե, գուցե չափազանցված կարող են թվալ նաև ողջ լինելու վերաբերյալ գնահատականները: Բոլոր դեպքերում, համանախագահի փոփոխությունը նշանակում է, որ Մոսկվան այդ ձևաչափում տեսնում է աշխատանքի որոշակի տարածություն: Անշուշտ հարցն այն է, թե ինչ տրամաբանությամբ և ինչ օրակարգով աշխատանքի մասին կարող է լինել խոսքը: Հետաքրքիր է նաև, թե արդյո՞ք իրենց համանախագահներին կփոխեն նաև ԱՄՆ ու Ֆրանսիան, հաշվի առնելով նոր իրողությունները, որոնք գուցե ենթադրում են նոր խնդիրներ դիվանագետների առաջ: Թեև, նոր խնդրի հանգամանքը ամենևին չի կարող ենթադրել նոր դիվանագետի անհրաժեշտություն: Այդուհանդերձ, Ռուսաստանը նշանակում է նոր համանախագահ, ինչը անկասկած նշանակելու է նաև որոշակի ծավալի նոր աշխատանք:
Իրավիճակն անշուշտ արտառոց կամ տարօրինակ չէ, որովհետև, ինչպես դեսպանները առանձին երկրներում, եռանախագահության ձևաչափում էլ երեք երկրները պարբերաբար փոխել են իրենց դիվանագետներին: Իհարկե այդ փոփոխությունները ոչ միշտ են եղել բացառապես ռոտացիայի սկզբունքով պայմանավորված, և այդ իմաստով հատկանշական է, որ Ռուսաստանը փոխում է Մինսկի խմբի համանախագահին մի շրջափուլում, երբ կարծես թե բավականին դինամիկ քննարկումներ են համանախագահ երկրների միջև՝ ձևաչափի հեռանկարի շուրջ, ինչը իր հերթին նկատելի անհանգստություն է առաջացրել Բաքվում ու Անկարայում:
Լուսանկարը՝ Photolure-ի