Լուսանկարը՝ SputnikArmenia-ի
Հայաստանի արտաքին քաղաքական գերատեսչության ղեկավար Արարատ Միրզոյանն այսօր աշխատանքային այցով կմեկնի Ռուսաստան։
Ըստ Հայաստանի արտգործնախարարության՝ Միրզոյանի կհանդիպի ռուսաստանցի իր պաշտոնակից Սերգեյ Լավրովի հետ, որին կհաջորդի մամուլի ասուլիսը։ Նախատեսված է նաև հանդիպում ՀԱՊԿ Գլխավոր քարտուղար Ստանիսլավ Զասի հետ։
Սա Միրզոյանի առաջին արտասահմանյան այցն է` արտգործնախարարի պաշտոնը ստանձնելուց հետո։
Ինչպես Ռուսաստանի արտգործնախարարությունն է հաղորդել՝ «ակնկալվում է, որ նախարարները հանգամանալից կքննարկեն բոլոր ոլորտներում ռուս-հայկական դաշնակցային հարաբերությունների զարգացման, ընդհանուր ինտեգրացիոն միավորումներում՝ ԱՊՀ, ՀԱՊԿ և ԵԱՏՄ, ինչպես նաև ՄԱԿ-ում, ԵԱՀԿ-ում և այլ միջազգային կազմակերպություններում դիրքորոշումների համակարգման ուղղությամբ հետագա քայլերը:
Կքննարկվի Լեռնային Ղարաբաղի հարցով Ռուսաստանի, Հայաստանի և Ադրբեջանի ղեկավարների 2020 թվականի նոյեմբերի 9-ի և 2021 թվականի հունվարի 11-ի պայմանավորվածությունների կատարման ընթացքը` ներառյալ հումանիտար հարցերը և Հարավային Կովկասում տնտեսական և տրանսպորտային կապերի ապաշրջափակումը»։
Քաղաքագետ Ռոբերտ Ղևոնդյանը բնական է համարում, որ ՀՀ արտգործնախարարի առաջին այցը Մոսկվա է տեղի ունենում։ «Առաջին լրատվական»-ի հետ զրույցում Ղևոնդյանն ասաց․ «Դա կապված է Հայաստանի ու Ռուսաստանի ռազմավարական, դաշնակցային հարաբերությունների հետ։ Եթե ուշադրություն դարձնենք՝ շատ հաճախ են մեր պաշտոնյաները իրենց առաջին այցը Մոսկվա կատարում և ընդհանուր առմամբ Ռուսաստան շատ հաճախ են այցեր տեղի ունենում։ Պաշտպանության նախարարը վերջին մեկ ամսվա ընթացքում երկու անգամ Մոսկվա այցելեց։ Կարծում եմ՝ նորմալ տրամաբանության մեջ է այս այցը»։
Խոսելով մամուլի այն հրապարակումների մասին, թե Մոսկվան չի ցանկացել, որ ՀՀ արտաքին գերատեսչության պաշտոնում նշանակվի Արմեն Գրիգորյանը, մեր զրուցակիցն ասաց․«Նման բան պնդելու համար փաստեր չկան։ Իհարկե կան խոսակցություններ, բայց դրանք հիմնված չեն որևէ ռեալ փաստերի վրա։ Արմեն Գրիգորյանն, այո՛, չնշանակվեց, թե ինչ պատճառներով՝ հավանաբար կիմանան նրան չնշանակողները։ Ինչ վերաբերում է Մոսկվայի դերակատարության արտգործնախարարի նշանակման հարցում, ապա ես չեմ գտնում, որ այնպես է, որ Արմեն Գրիգորյանի ու Արարատ Միրզոյանի թեկնածուները մեծ տարբերություն կարող էին ունենալ Մոսկվայի համար։ Կարելի է ենթադրել, որ եթե Մոսկվան իսկապես դեմ լիներ Արմեն Գրիգորյանի նշանակմանը, նույն կերպ, հավանաբար, դեմ կլիներ նաև Արարատ Միրզոյանի նշանակմանը»։
Քաղաքական մեկնաբան Հակոբ Բադալյանի կարծիքով՝ այն, որ ՀՀ նախարարները, քաղաքական ղեկավարության պաշտոնյաները առաջին այցը կատարում են Մոսկվա՝ շատ վաղուցվանից հասկանալի իրավիճակ է․ «Դա պայմանավորված է այն մեծ ազդեցությամբ, որը տարածաշրջանում և մասնավորապես Հայաստանում ունի Մոսկվան։ Անկախ նրանից, թե մենք ինչպես ենք գնահատում այդ ազդեցությունը, այսօր առավել ևս վիճակն այնպիսին է, որ այդ պատկերը փոխելու մոտալուտ հեռանկար այդքան էլ չի ուրվագծվում։ Եվ այստեղ իրավիճակն այնքան էլ զարմանալի չէ։ Ես կարծում եմ, որ խնդիրն այդ դաշտում չէ։ Այսինքն՝ եթե նույնիսկ առաջին այցը Մոսկվա չկատարվեր, չեմ կարծում, թե դրանից պատկերը այս պահին և տեսանելի ապագայում էական փոփոխություն ունենալու է։ Եթե մենք խոսում ենք Հայաստանի հանդեպ Ռուսաստանի ազդեցության կամ գերազդեցության թուլացման կամ ընդհանրապես Հայաստանի արտաքին քաղաքականության դիվերսիֆիկացման և թեկուզ այդ փոխլրացման քաղաքականության վերադարձի մասին, սա լինելու է երկարաժամկետ գործընթաց և պայմանավորված ոչ միայն Հայաստանի գործողություններով, այլ Հայաստանի շուրջ իրավիճակով՝ ավելի լայն իմաստով»,-«Առաջին լրատվական»-ի հետ զրույցում ասաց նա։
Թե ինչ ակնկալիք կարող ենք ունենալ Արարատ Միրզոյանի՝ Մոսկվա կատարած այցից, մեր զրուցակիցն ասաց․«Ես կարծում եմ, որ այցը հիմնականում լինելու է պարզապես ճանաչողական։ Արտգործնախարար Միրզոյանի առաջին շփումն է լինելու Ռուսաստանի արտգործնախարարի հետ և իհարկե կքննարկվեն գործնական, ընթացիկ հարցեր։ Բաց հիմնական իմաստով այցը կլինի ճանաչողական»։
Ինչ վերաբերում է Հայաստանի կադրային քաղաքականության, մասնավորապես Արմեն Գրիգորյանի չնշանակման կապակցությամբ Մոսկվայի դերակատարությանը, մեր զրուցակիցն ասաց․«Հայկական մամուլում հրապարակումները երբեմն լինում են պարզապես հորինվածքի տրամաբանությամբ։ Քանի որ ես ինքս չունեմ որևէ տեղեկատվություն, որ իսկապես Արմեն Գրիգորյանը պետք է նշանակվեր, բայց չնշանակվեց Մոսկվայի պատճառով, ինքս չեմ կարող ասել, թե այդ մեկնաբանությունը որքանով է համապատասխանում իրականությանը։ Մեծ հաշվով, ես չեմ կարծում, որ այստեղ կարող են լինել դեմարշային նշանակումներ կամ փորձեր։ Բայց կրկնում եմ, կոնկրետ նշանակման առումով ես ինքս չգիտեմ, թե այդ մամուլի հրապարակումները որքանով էին հավաստի։ Երբ Արմեն Գրիգորյանը նշանակվում էր Անվտանգության խորհրդի քարտուղար, գրեթե նույն կերպ խոսում էին, որ Մոսկվան դեմ է, Մոսկվան չի հանդուրժի։ Բայց հետո Արմեն Գրիգորյանը կարծես թե աշխատում էր Մոսկվայի հետ և բազմաթիվ հանդիպումներ եղան Պատրուշևի հետ։ Այս տեսանկյունից, կրկնում եմ, ես բացարձակապես չեմ կարող մեկնաբանել, թե որքանով են այդ գնահատականները համապատասխանում իրականությանը»։
