Ազգային ժողովում մի քանի օր տևած համառ մարտերից հետո ընդունված կառավարության ծրագիրը մասնագետները դրական են գնահատում, լավը՝ նախորդ բոլոր կառավարությունների ծրագրերի համեմատ։
Տնտեսագետ, «Տնտեսական իրավունքի կենտրոն» ՀԿ նախագահ Մովսես Արիստակեսյանը «Առաջին լրատվական»-ի հետ զրույցում ասաց, որ մանրամասն ուսումնասիրել է կառավարության ծրագիրը։ Ըստ նրա այս ծրագիրը մի քայլ առաջ է կառավարոթւյան նախորդ բոլոր ծրագրերից, որոնք ընդամենը դեկլարացիաներ էին։ «Այս ծրագրի կարևորագույն հատկանիշն այն է, որ կան արդյունքային ցուցանիշներ։ Ցուցանիշներ, որոնք կգնահատեն կառավարության գործողությունները այս տարիների ընթացքում և կլինեն այն միջոցները, որոնցով հնարավոր կլինի վերահսկել, թե արդյոք կառավարությունը կատարում է ծրագիրը, թե ոչ։ Եվ սա առաջընթաց է ։ Կառավարությունը նախորդիվ հաշվի առնելով մեր՝ քաղհասարակության կողմից հնչած ամենատարբեր քննադատությունները, դրանք փորձել է ներառել ծրագրի մեջ»,-ասաց Արիստակեսյանը՝ ավելացնելով, որ ծրագիրն, ամեն դեպքում լիարժեք ռազմավարական չէ, ոչ բոլոր հատվածներն են իրար հետ փոխկապակցված արդյունքների և նպատակների առումով, բայց հուսով եմ, որ դրանք գործողությունների ծրագրով արդեն փոխկապակցված կլինեն և կլրացնեն կառավարության ծրագրի բացը։
Ամեն դեպքում տնտեսագետը մի քանի թերություններ է նկատել , որոնցից առաջինն այն է, որ կառավարությունը բացարձակապես մոռացել է քաղաքացիական հասարակության հետ համագործակցության մասին, որի վերաբերյալ նախկինում բազում խոստումներ էր տվել կառավարությունը.«Ամբողջ ծրագրում չկա որևէ մի բառ քաղհասարակության հետ համագործակցության վերաբերյալ, որը խորը և խոշոր բացթողում է։ Դա հեղափոխության ժամանակ ժողովրդին տված խոստումներից է, դա նաև ամրագրված է նաև Սեպայի համաձայնագրով, որտեղ ամրագրված է, որ կառավարությունն ունի հանձնառություն քաղաքացիական հասարակության հետ համագործակցության վերաբերյալ։ Ինչու չէ այդ համագործակցության առաջին գործողություն պետք է լինի մոնիտորինգը, վերահսկողությունը կառավարության գործողությունների նկատմամբ քաղհասարակության կազմակերպությունների կողմից։ Բայց, ցավոք, ոչ մի խոսք դրա մասին։ Չեմ կարծում, որ խրախուսելի է կառավարության այսպիսի գործունեությունը։ Կառավարությունը առանց քաղհասարակության հետ համագործակցության, չի կարող հասնել իր նպատակներին, քանզի քաղհասարակությունն այն միջնորդ կապն է կառավարության և քաղաքացիների միջև, որը աջակցելու է պետության ծրագրերի իրականացման համար»,-ասաց տնտեսագետը՝ հավելելով, որ շատ կարևոր է, որպեսզի գործողությունների ծրագրով նախատեսվի կառավարություն-քաղաքացիական հասարակություն ռազմավարական ծրագրերի մշակում, ներդնում, պետական բյուջեի մեջ նպատակային ծրագրի ամրագրում, որով քաղաքացիական հասարակության կազմակերպությունները պետական բյուջեից կֆինանսավորվեն հենց այդ ծրագրի կատարման մոնիտորինգն իրականացնելու շրջանակներում։
Հաջորդ բացթողումը, որը նկատել է Արիստակեսյանը, այն է, որ ամբողջ փաստաթղթում չկա որևէ բառ անցումային արդարադատության մասին, որի մասին հռչակվել է ինչպես հեղափոխության ժամանակ, այնպես էլ 2018 թվականի օգոստոսի 17-ի վարչապետի հրապարակային խոսքում։ «Անցած երկու տարիներին չի իրականացվել անցումային արդարադատություն, չի իրականացվում հիմա և որևէ խոսք չկա կոռուպցիայի դեմ պայքարի շրջանակներում փաստահավաք խմբի ստեղծման մասին։ Կոռուպցիայի դեմ պայքարի շրջանակներոմ դեռ անցած տարի պետք է ստեղծվեր փաստահավաք խումբ, որը կհավաքագրեր կոռուպցիայի վերաբերյալ բոլոր փաստերը նախորդ ժամանակահատվածի վերաբերյալ, որը հիմք կհանդիսանար անցումային արդարադատության համար։ Իսկ այդ փաստահավաք խմբում պետք է ընդգրկվեին քաղհասարակության ներկայացուցիչները։ Չկա, չի ձևավորվել, չի գործում այդ փաստահավաք խումբը։ Ավելին, խոսք անգամ չկա վեթինգի մասին։ Վեթինգ, ոչ միայն դատաիրավական ոլորտի ներկայացուցիչների, այլ բոլոր պաշտոնյաների՝ սկսած ՀՀ նախագահից ու վարչապետից։ Ցավոք, կրկնում եմ, ոչ մի խոսք չկա կառավարության ծրագրում այս ամենի մասին»,-ընդգծեց Արիստակեսյանը։
