Հարվարդի հանրային առողջության դպրոցի գիտնականները ցույց են տվել, որ ընկուզեղենի կանոնավոր օգտագործումն օգնում է պահպանել առողջ քաշը և նվազեցնել քաղցկեղի և սրտի հիվանդությունների հավանականությունը, հաղորդում է Express պարբերականը:
շՍննդաբանները մի շարք հետազոտություններ են անցկացրել և պարզել, որ ընկույզներն առողջարար սննդամթերք են, որ կարող են երկարացնել կյանքը:
Մասնագետները պարզել են, որ այն մարդկանց մոտ, ովքեր ամեն օր օգտագործում են այս սննդամթերքը, 20 տոկոսով նվազում է վաղաժամ մահվան հավանականությունը:
Սննդաբանության պրոֆեսոր Ֆրենկ Հուն ընդգծել է, որ ընկուզեղենի սիրահարներն ավելի երկար և առողջ են ապրում, քան նրանք, ովքեր հանել են դրանք սննդակարգից: Ամերիկացի փորձագետները հիշեցրել են, որ ընկույզը պարունակում է օգտակար չհագեցած ճարպեր, վիտամիններ, հանքանյութեր և ֆոտոքիմիական նյութեր: Բացի այդ, այս սննդամթերքն ունի «սրտապաշտպան, հակաքաղցկեղածին, հակաբորբոքային և հակաօքսիդիչ հատկություններ»:
«Ընկուզեղենը հարուստ է սպիտակուցներով և բջջանյութով, որոնք հետաձգում են սննդանյութերի յուրացումը և պակասեցնում քաղցի զգացողությունը», – հավելել է Հուն:
Ընկուզեղենի ևս մեկ օգտակար հատկությունն այն է, որ համաձայն այս և այլ հետազոտությունների՝ ընկույզ ուտողների մոտ քաշ հավաքելու հավանականությունն ավելի քիչ է: