Աֆղանստանի իրադարձություններից հետո պարզ դարձավ, որ եվրոպական երկրները պաշտպանության ոլորտում անկախ չեն և դրա համար լիովին ապավինում են ԱՄՆ-ին: Լրագրող Դանիել Բրեսլերի համապատասխան նյութը հրապարակվել է «Süddeutsche Zeitung»-ում:
Բրեսլերի խոսքով՝ Եվրոպայի անօգնականությունը հստակ տեսանելի էր Քաբուլի օդանավակայանից մարդկանց տարհանման ժամանակ:
«ՆԱՏՕ-ի անդամներից ոչ մեկը քայլի չէր գնա առանց Միացյալ Նահանգների հրահանգների: Պարզ դարձավ, որ Գերմանիայի, Ֆրանսիայի և Մեծ Բրիտանիայի ցանկությունները երկրորդական նշանակություն ունեն զորքերի դուրսբերման հարցում»,-նշել է նա:
Հոդվածի հեղինակը ընդգծել է, որ նույնիսկ 2017-ի նախընտրական քարոզարշավի ընթացքում Գերմանիայի կանցլեր Անգելա Մերկելը եվրոպական առաջնորդներին կոչ է արել ավելի մեծ պատասխանատվություն ստանձնել իրենց երկրների անվտանգության ապահովման գործում, սակայն դրանից հետո «ոչինչ չի փոխվել»:
Այն դեպքում, եթե Միացյալ Նահանգները «դադարի գործ ունենալ» եվրոպական պետությունների հետ, դա նրանց լուրջ ռիսկի առջև կկանգնեցնի:
Ավելի վաղ հաղորդվել էր, որ Ֆրանսիան դադարեցրել է իր քաղաքացիների և իր ներկայացուցիչների հետ համագործակցող աֆղանցիների տարհանման գործողությունը: Երկրի ԱԳՆ-ն հայտարարել է, որ Քաբուլի օդանավակայանի անվտանգության ապահովման համար պատասխանատու ամերիկյան ուժերի արագ դուրսբերումը հաստատվելուց հետո օդանավակայանի պայմաններն այլևս չեն համապատասխանում անվտանգության չափանիշներին: