Օգոստոսի 25-ի երեկոյան ադրբեջանցիները փակեցին Սյունիքի մարզի Շուռնուխ-Կարմրաքար ճանապարհահատվածը , իսկ հետո ՀՀ Սյունիքի մարզի Գորիսից Որոտան տանող ճանապարհը, օգոստոսի 27-ին արդեն Կապան-Գորիս միջպետական Մ2 ճանապարհը բացվեց:
Վարչապետ Նիկոլ Փաշինյանը մեկնաբանելով իրավիճակը նշել էր՝ Ադրբեջանը ճանապարհ փակելով փորձում է հարվածել մեր առաջ քաշած խաղաղության օրակարգին։
Ռուսաստանցի քաղաքական մեկնաբան Վադիմ Դուբնովի կարծիքով՝ Ադրբեջանի քաղաքական նպատակները միանգամայն ակնհայտ են․ «Ադրբեջանը Հայաստանի և որոշակիորեն նաև Մոսկվայի վրա ճնշումներ է գործադրում՝ փորձելով հասնել սահմանի հետ կապված ինչ-որ քննարկումների ու պայմանավորվածությունների։ Այդ կերպ նա ուզում է ամրապնդել նախորդ տարվա պատերազմում իր կրած հաղթանակը։ Իմ կարծիքով՝ այն ամենը, ինչով զբաղված էր Ադրբեջանը պատերազմից հետո՝ հենց ճնշումներ գործադրելն է Հայաստանի վրա, ինչ իր տեսանկյունից միանգամայն հասկանալի ու տրամաբանական է»,-«Առաջին լրատվական»-ի հետ զրույցում ասաց նա։
Այն հարցին՝ արդյոք այդ ճնշումների նպատակը նաև իր ուզած պայմաններով խաղաղության համաձայնագրի ստորագրումն է, Վադիմ Դուբնովն ասաց․ «Չեմ կարծում, թե խոսքը խաղաղության պայմանագրի մասին է։ Ընդհանրապես խաղաղության պայմանագիրը միայն մեկ փաստաթուղթ չէ, բավականին երկար գործընթաց է պահանջվում։ Դեռ շատ երկար ժամանակ այն կքննարկվի, կհամաձայնեցվի, կկանոնակարգվի, կդառնա առևտրի որոշակի առարկա։ Այստեղ կմասնակցեն մի շարք միջնորդներ և իհարկե տեղ կգտնվի առաջին հերթին Ռուսաստանի համար, նաև՝ Թուրքիայի, գուցե մասնակիորեն նաև Մինսկի խմբի համար։ Բայց Հայաստանը, հասկանալի պատճառներով, խուսափում է նման քննարկումներ սկսելուց։ Հասկանալի պատճառներով էլ Ադրբեջանը ուզում է որքան հնարավոր է շուտ սկսել այդ քննարկումները։ Այդ պատճառով էլ ճնշումներ են գործադրվում Հայաստանի վրա բոլոր այն շրջանակներում, որոնք կոնկրետ արգելված չեն նոյեմբերի 9-ի եռակողմ համաձայնագրով։ Ֆորմալ առումով՝ ինքը ճանապարհներ է փակում իր տարածքում։ Դատելով այն հանգամանքից, թե ինչքան դժվար են տարվում բանակցությունների Մոսկվայի մասնակցությամբ, կարող ենք եզրակացնել, որ բավականին կոշտ պահանջներ են դրված կողմերի առաջ»։
Վադիմ Դուբնովի խոսքերով՝ Մոսկվան կխաղա իր խաղը խաղաղության պայմանագրի ստորագրման հարցում․ «Ես չեմ կարծում, որ տվյալ դեպքում Մոսկվան կխաղա Երևանի օգտին։ Նա կխաղա բացառապես իր խաղը։ Իսկ Մոսկվային հետաքրքրում է տարածաշրջանային կոմունիկացիաների ապաշրջափակման հարցն ու իր դերակատարությունն այդ հարցում։ Իսկ դրա համար Մոսկվան համար կփորձի աշխատել Երևանի հետ, բայց ավելի շատ՝ Բաքվի ու Անկարայի։Իմ դիտարկմամբ՝ Մոսկվան չի գնա առճակատման ո՛չ Բաքվի և ո՛չ էլ Անկարայի հետ։ Ինքը կփորձի պայմանավորվել այդ երկրների հետ, նրանց պահանջներն էլ ինչ-որ կերպ ներկայացնել Երևանին։ Այդ ամենը շատ դանդաղ է ընթանալու և այդ ժամանակահատվածում Ադրբեջանը երբեմն կդիմի այնպիսի քայլերի, որոնց որ հիմա է դիմում»։