«Կատինի հանցագործությունն իրականացվել է Ստալինի և այլ խորհրդային ղեկավարների ուղիղ հրամանով»,- ասված է այսօր Ռուսաստանի Պետդումայում ընդունված հայտարարության մեջ: Հայտարարության ընդունմանը կողմ են քվեարկել բոլոր խմբակցությունները՝ բացի կոմունիստներից, որոնք դեմ են արտահայտվել այդ օրինագծին: Վերջերս հայտնաբերվել է մի գրություն, որում Բերիան առաջարկում է Ստալինին` գնդակահարել լեհ սպաներին: Սա լրացուցիչ ապացույց է այն բանի, որ խորհրդային ղեկավարները պատասխանատվություն են կրել այդ հանցանքի համար:
Հիշեցնենք, որ այդ ժամանակ Կատին քաղաքի մոտ գտնվող անտառում գնդակահարվել են ավելի քան 22,000 լեհ սպաներ:
Պետդումայի հայտարարությունում ասված է, որ «Պետդուման խորը կարեկցանք է հայտնել անարդարացի բռնաճնշումների հետևանքով զոհվածների հարազատներին և բարեկամներին»: Պատգամավորները նաև նշել են, որ Կատինի սպանությունների տեխնոլոգիաները մշակվել են 1936-38թթ. խորհրդային քաղաքացիների վրա: Հայտարարության մեջ հույս է հայտնվել, որ սա կարող է հիմք դառնալ Լեհաստանի և Ռուսաստանի միջև հարաբերությունների նոր զարգացման համար: Նշվում է նաև արխիվային փաստաթղթերի և սպանվածների ցուցակների ուսումնասիրության անհրաժեշտության մասին: