Այս բևեռացումը լավ տեղ չի կարող տանել․ ԱԺ-ում ավելի վատ տեսարանների ականատես կլինենք

Խորհրդարանում կառավարության ծրագրի քննարկումը ուղեկցվեց աղմկոտ միջադեպով, որի «նախաձեռնողը» հերթական անգամ Պատիվ ունեմ դաշինքի պատգամավոր Աննա Մկրտչյանն էր, իր չափազանց սուր հռետորաբանությամբ: Պատգամավորը գրանցված լինելով վարչապետ Փաշինյանին հարց ուղղելու համար, այդ հնարավորությունը կարծես թե օգտագործում էր նրա հանդեպ կոշտ և անհարգալից գնահատականներ հնչեցնելու համար, ինչը մնաց կիսատ, առաջացրեց մեծամասնության բուռն արձագանքը, ԱԺ նախագահը հերթական անգամ կայացրեց պատգամավորին հեռացնելու որոշում, հրահանգեց իրականացնել դա ԱԺ պահպանության ծառայության աշխատակիցներին, ինչը առաջացրեց ընդդիմադիր երկու խմբակցությունների բուռն արձագանքը, պատգամավորին պաշտպանելու մղումը: Թեմայի շուրջ «Առաջին լրատվական»-ը զրուցել է քաղաքագետ Ռոբերտ Ղևոնդյանը և հասարակական գործիչ Նարինե Դիլբարյանի հետ: