ՀԱՊԿ-ի (Հավաքական անվտանգության պայմանագրի կազմակերպություն) Հավաքական անվտանգության խորհրդի արտահերթ նիստի արդյունքներով օնլայն ճեպազրույցի ժամանակ ՀԱՊԿ գլխավոր քարտուղար Ստանիսլավ Զասը հայտարարել է, որ ՀԱՊԿ-ի և ՆԱՏՕ-ի համագործակցությունը օգտակար կլիներ Աֆղանստանից եկող սպառնալիքները տեղայնացնելու համար, սակայն ՆԱՏՕ-ն նման համագործակցության պատրաստակամություն չի ցուցաբերում:
Զասը նաև ընդգծել է, որ Աֆղանստանին հարևան ՀԱՊԿ-ի անդամ երկրների տարածքում ամերիկյան զորքերի տեղաբաշխման հնարավորության հարցը պետք է համաձայնեցվի, այդ թեման կարգավորվում է կազմակերպության կանոնադրությամբ:
Հիշեցնենք՝ այսօր՝ օգոստոսի 23-ին առցանց ձևաչափով տեղի է ունեցել ՀԱՊԿ-ի Հավաքական անվտանգության խորհրդի արտահերթ նիստ: Նիստին մասնակցել են կազմակերպության անդամ պետությունների՝ Հայաստանի, Ռուսաստանի, Բելառուսի, Ղազախստանի, Տաջիկստանի, Ղրղզստանի ղեկավարները, ՀԱՊԿ գլխավոր քարտուղարը, ինչպես նաև որպես հրավիրյալ՝ Ուզբեկստանի նախագահը:
Նիստի ընթացքում ՀԱՊԿ առաջնորդները քննարկել են ՀԱՊԿ պատասխանատվության գոտում անվտանգության ապահովմանը, Աֆղանստանում ստեղծված իրավիճակին առնչվող հարցեր, հաղորդում է ՀԱՊԿ-ի մամուլի ծառայությունը: