«Թալիբան» արմատական շարժումը, որը վերահսկողության տակ է վերցրել Աֆղանստանի ողջ տարածքը, բացառությամբ մեկ նահանգի՝ Փանջշերի, այնտեղի դիմակայության առաջնորդ Ահմեդ Մասուդին 4 ժամ է տվել հանձնվելու համար։ Այս մասին հայտնում է Al-Arabiya հեռուստաալիքը։
Թալիբները հայտարարել են, որ իրենց պայմանների չկատարման դեպքում, իրենք կսկսեն գրոհը Փանջշերի վրա, որտեղ գտնվում է Մասուդն ու Աֆղանստանի առաջին փոխնախագահ Ամրուլա Սալեհը։
Նշվում է, որ թալիբների ջոկատները բերված են լիարժեք պատրաստության՝ նահանգի գրավման օպերացիայի անցնելու համար։
Մասուդը թալիբերի դեմ կռված «Հյուսիսային դաշինքի» հանգուցյալ առաջնորդ Ահմադ Շահ Մասուդի որդին է։
Փանջշերն Աֆղանստանի 34 նահանգներից մեկն է, որն ունի ավելի քան 140 հազար բնակչություն և շատ բարդ ռելիեֆ։ Նահանգում էին տեղակայվել ՆԱՏՕ-ի զորքերի հիմնական ուժերը՝ ԱՄՆ-ի գլխավորությամբ։ Թալիբներին չէր հաջողվել զավթել Փանջշերը նաև 25 տարի առաջ, երբ նրանք իշխանության եկան 1996 թվականին․«Հյուսիսային դաշինքի» առաջնորդ Ահմադ Շահ Մասուդը նրանց դիմակայություն էր ցուցաբերել՝ ամրապնդելով ուժերն այդ նահանգում։
