Բոլիվիայի նախկին նախագահ Ժանին Անիեսը, ով ձերբակալված է պետական հեղաշրջման գործով, փորձել է բանտում ինքնասպան լինել։ Այս մասին գրում է Reuters-ը՝ հղում անելով նրա փաստաբաններին։
Անիեսը փորձել է վնասել երակները՝ երեք կտրվածք հասցնելով դաստակին։ Նրան նկատել է բանտային բժիշկը և տեղափոխել բանտին կից հիվանդանոց։ Երկրի ներքին գործերի նախարար Կառլոս Կաստիլիոյի խոսքով՝ նրա առողջությանը վտանգ չի սպառնում։
Փաստաբաններն Անիեսի հոգեբանական վիճակը գնահատում են ծանր և փորձում նրան ազատ արձակել՝ որպես պատճառ ներկայացնելով առողջական վատ վիճակը։ Ինքնասպանության փորձից մեկ օր առաջ նրան ցեղասպանության մեղադրանք էր առաջադրվել․ այդպես է դատախազությունը որակել 2019 թվականին բողոքի ակցիաների ճնշումը։
Հիշեցնենք, որ Անիեսը եղել է Բոլիվիայի սենատում ընդդիմության առաջնորդը, և 2019 թվականի նոյեմբերին, երբ Բոլիվիայում քաղաքական ճգնաժամ է սկսվել, իրեն հայտարարել է նախագահի պաշտոնակատր մինչ նոր ընտրությունները։ Նա նախագահի տեղը զբաղեցրել է Էվո Մորալեսի հրաժարականի ֆոնին, ով երկիրը կառավարել է 13 տարի։ Մորալեսի կողմնակիցները չեն ընդունել Անիեսին։ Զանգվածային ցույցերն ավարտվել են ճնշմամբ ու 37 մարդու մահով։
2021 թվականի մարտին Անիեսին և նրա վարչակազմի մի քանի անդամի ձերբակալել են պետական հեղաշրջման նախապատրաստման և դրան մասնակցելու համար։ Նրան սպառնում է նաև բողոքի ակցիաների ժամանակ 20 մարդու մահվանը մասնակցություն ունենալու վերաբերյալ մեղադրանքը։ Անիեսը հերքում է մեղադրանքները և պնդում, որ ինքը քաղաքական հետապնդման զոհ է։