Մեծ Բրիտանիայի վարչապետ Բորիս Ջոնսոնը հավաստիացրել է, որ պատրաստ է աշխատել «Թալիբան» շարժման ներկայացուցիչների հետ ՝ Աֆղանստանում ճգնաժամի դիվանագիտական և քաղաքական լուծում գտնելու համար:
«Ես ցանկանում եմ մարդկանց հավաստիացնել, որ մենք կշարունակենք քաղաքական և դիվանագիտական լուծումներ փնտրել Աֆղանստանի իրադրության շուրջ և, իհարկե, եթե հարկ լինի, կաշխատենք «Թալիբանի» հետ», – ասել է Ջոնսոնը Sky News հեռուստաալիքի եթերում։
Ընդ որում, Մեծ Բրիտանիայի վարչապետը կարծում է, որ այս փուլում հնարավոր է հավատալ «Թալիբանի» հայտարարություններին այն հույսով, որ թալիբները մտադիր են անել այն, ինչ խոստանում են:
Վարչապետը կարծում է, որ Աֆղանստանում իրավիճակը մի փոքր բարելավվել է։
«Իրավիճակը բարելավվել է, և մենք տեսնում ենք կայունացում օդանավակայանում [Քաբուլի]», – հայտարարել է նա:
«Երեկ մեզ հաջողվել է դուրս բերել մոտ հազար մարդ, այսօր ևս հազար մարդ, և նրանցից շատերը ակնհայտորեն օրինական իրավունք ունեն Մեծ Բրիտանիա վերադառնալու, ինչպես նաև շատերը երկիր են վերադառնում Աֆղանստանի վերաբնակեցման և օգնության ծրագրով», – հավելել է վարչապետը:
Օգոստոսի 17-ին Քաբուլում կայացած մամուլի ասուլիսում շարժման պաշտոնական ներկայացուցիչ Զաբիհուլլա Մուջահիդը հավաստիացրել է, որ թալիբները չեն պատրաստվում վրեժխնդիր լինել, երկրի տարածքը վերածել պլացդարմի ՝ հարևաններին սպառնալու համար և մտադիր են Աֆղանստանը «բոլորի համար միասնական» դարձնել: Նա խոստացել է Աֆղանստանը դարձնել առանց թմրանյութերի երկիր, ապահովել Աֆղանստանում կանանց իրավունքների պահպանումը շարիաթի օրենքներին համապատասխան, շփումներ պահպանել ԶԼՄ-ների հետ:
