Բրիտանիան Ալեքսեյ Նավալնիի «թունավորման» հետ կապված՝ քիմիական զենքի կիրառման պատժամիջոցների ցուցակում ներառել է յոթ ռուսաստանցու, ասվում է երկրի ԱԳՆ կայքում տեղադրված հաղորդագրության մեջ:
Այդ ցանկում են Ալեքսեյ Ալեքսանդրովը, Վլադիմիր Պինյաևը, Իվան Օսիպովը, Վլադիմիր Բոգդանովը, Կիրիլ Վասիլիևը, Ստանիսլավ Մախակովը և Ալեքսեյ Սեդովը: Ըստ բրիտանական կողմի՝ նրանք բոլորը ռուսական ԱԱԾ աշխատակիցներ են:
Առաջին անգամ Մեծ Բրիտանիան պատժամիջոցներ կիրառեց ռուսների նկատմամբ, որոնք, իր տեսանկյունից, պատասխանատու էին 2020 թվականի հոկտեմբերին ընդդիմության առաջնորդ Ալեքսեյ Նավալնիի «թունավորման» համար: Այնուհետև ցուցակում ընդգրկվեցին ԱԱԾ տնօրեն Ալեքսանդր Բորտնիկովը, Ռուսաստանի Դաշնության նախագահի աշխատակազմի ղեկավարի առաջին տեղակալ Սերգեյ Կիրիենկոն, ներքին քաղաքականության գծով նախագահի աշխատակազմի ղեկավար Անդրեյ Յարինը, Սիբիրում լիազոր ներկայացուցիչ Սերգեյ Մենյայլոն, պաշտպանության փոխնախարար Պավել Պոպովը և Ալեքսեյ Կրիվորուչկոն: Նաև պատժամիջոցներ են կիրառվել մեկ ռուսական կազմակերպության՝ Օրգանական քիմիայի և տեխնոլոգիայի պետական հետազոտական ինստիտուտի նկատմամբ:
Կրեմլն ավելի վաղ մերժել էր արգելված թունավոր նյութերի առկայության մեղադրանքները՝ հավելելով, որ Ռուսաստանը հավատարիմ է քիմիական զենքի մասին կոնվենցիայով ստանձնած բոլոր պարտավորություններին: ՌԴ ԱԳՆ-ն նշել է, որ Ռուսաստանը քիմիական զենք չի մշակում կամ արտադրում, իսկ քիմիական զենքի վերջին միավորը ոչնչացվել է 2017 թվականին, ինչը հաստատել է ՔԶԱԿ-ը (Քիմիական զենքի արգելման կազմակերպություն):
Նավալնին անցած տարվա օգոստոսի 20-ին հոսպիտալացվել էր Օմսկում այն բանից հետո, երբ վատ էր զգացել Տոմսկից ուղևորվող ինքնաթիռում: Հետազոտությունների արդյունքում Օմսկի բժիշկների հիմնական ախտորոշումն էր նյութափոխանակության խանգարումը, որն առաջացրել է արյան մեջ շաքարի կտրուկ փոփոխությունից: Դեռ պարզ չէ, թե ինչն է այն առաջացրել, սակայն Օմսկի բժիշկների խոսքով, Նավալնիի արյան և մեզի մեջ թույներ չեն հայտնաբերվել:
Ավելի ուշ նա ինքնաթիռով տեղափոխվել էր Գերմանիա: Դրանից հետո ԳԴՀ կառավարությունը, վկայակոչելով ռազմական բժիշկներին, հայտարարել էր, որ իբր Նավալնին թունավորվել է քիմիական «Նովիչոկ» նյութից: