Ֆուտբոլի Եվրոպա լիգայի փլեյ-օֆի առաջին խաղում Երևանի «Ալաշկերտը» հյուրընկալվելիս 1։0 հաշվով զիջեց Շոտլանդիայի չեմպիոն «Ռենջերսին»։ Մեր թիմը մոտ էր հզոր ակումբի դեմ խաղում նաև դրական, արդյունքի հասնելուն, բայց․․․։ Առաջին կեսի վերջնամասում շոտլանդական ակումբը մնաց 10 ֆուտբոլիստներով և թվում էր թե երկրորդ խաղակեսում խաղի պատկերը կփոխվի։ Հանդիպումից առաջ «Ալաշկերտի» գլխավոր մարզիչ Ալեքսանդր Գրիգորյանն ասել էր, որ իրենց գլխավոր խնդիրը լինելու է գնդակ պահելը, գնդակի վերահսկումը։ Առաջին կեսում մեր ֆուտբոլիստները հստակ կատարեցին խնդիրը։ Մի քանի անգամ ավելի ուժեղ մրցակցի դեմ նրա իսկ հարկի տակ բաց ֆուտբոլ խաղալը կլիներ ինքնասպանություն։ Նույնիսկ քանակական առավելությունից հետո բաց մարտավարությամբ պայքարելը կարող էր ծանր հետևանքներ ունենալ։
«Ռենջերսն» արագ և դինամիկ թիմ լինելուց զատ ունի բազմաթիվ կատարողներ, որոնք կարող էին հենց առաջին խաղում վճռել դիմակայության ելքը։ Գրիգորյանի մարտավարությունը ավելի արդյունավետ կարող էր լինել, եթե հանդիպման սկզբնամասում վնասվածք չստանար և չփոխարինվեր աջ կիսապաշտպան Աղվան Պապիկյանը։ «Ալաշկերտը» գնդակ պահելով պետք է փորձեր Պապիկյանի արագության հաշվին օգտագործեր մրցակցի գրոհների ժամանակ առաջացած բաց տարածությունները։ Պապիկյանին փոխարինած Գոմեի խաղը չստացվեց, ինչի հետևանքով էլ տեղաշարժը դեպի մրցակցի տուգանային հրապարակը չէր ստացվում։ Դաշտի միջին հատվածում ամեն ինչ նորմալ էր։ Գրիգորյանին հաջողվել էր նաև կարգավորել գործողությունները մրցակցի ստանդարտ դիրքի իրացման ժամանակ։ 0։0 արդյունքը հնարավոր կլիներ որակել գերազանց, բայց մեր պաշտպանները դիրքային կոպիտ սխալ թույլ տվեցին ինչի հետևանքով դաշտի տերերը խփեցին հաղթական գնդակը։ Սխալներից ոչ-ոք ապահովագրված չէ։ Հանուն արդարության պետք է նշենք, որ «Ռենջերսը» կարող էր հաղթել ավելի մեծ հաշվով։ Որոշ դեպքերում նույնիսկ մարզական բախտը ժպտաց «Ալաշկերտին»։ Մեծ հաշվով Հայաստանի թիմը արժանի խաղ ցուցադրեց եվրոպական հեղինակավոր ակումբի դեմ։ Ալեքսանդր Գրիգորյանի մարտավարությունը աշխատեց և պատասխան հանդիպումից առաջ մերոնք ունեն հնարավորություն հաղթելու դիմակայությունում։ Այո, մեզ սպասվում է անչափ բարդ խաղ, բայց հաղթել ամեն դեպքում կարելի է։
Գլազգոյում կայացած հանդիպումից առաջ Գրիգորյանն ասել էր նաև, որ դիմակայության ելքը վճռվելու է Երևանում։ Այսինքն երեկ գրանցված արդյունքը սպասելի էր Գրիգորյանի համար և այն այսպես ասած նախախաղային պլանի շրջանակում է։ Ավելի ստույգ Գրիգորյանին հաջողվեց դիմակայությունը Գլազգոյից բերել Երևան։ Պետք է խոստովանենք, որ նույնիսկ երկու գնդակի տարբերությամբ պարտությունը ըստ էության կնշանակեր պարտություն դիմակայությունում։ Օգոստոսի 26-ին կայանալիք պատասխան հանդիպումից առաջ ունենք միանգամայն այլ պատկեր։ Չմոռանանք, որ Երևանում «Ալաշկերտի» կողքին կլինի նաև 12-րդ ֆուտբոլիստը՝ երկրպագուն։ Ակնկալվում է, որ «Հանրապետական» մարզադաշտն այն օրը լեցուն կլինի։
Ակնկալում ենք նաև, Ալեքսանդր Գրիգորյանի երևանյան պլանը կաշխատի էլ ավելի արդյունավետ։ Հիշեցնենք, որ պարտության դեպքում «Ալաշկերտը» պայքարը կշարունակի Կոնֆերենցիաների լիգայի խմբային փուլում։ Պատմության ընթացքում հայկական ոչ մի ակումբի չէր հաջողվել դուրս գալ եվրագավաթների մրցաշարերի խմբային փուլ։
