Գերմանիայի կանցլեր Անգելա Մերկելն այսօր ժամանել է Մոսկվա ՌԴ նախագահ Վլադիմիր Պուտինի հետ բանակցելու համար։
Վլադիմիր Պուտինը և Անգելա Մերկելը բանակցություններ են սկսել Կրեմլում։
«Ռոսիա-1» հեռուստաալիքի եթերում ցուցադրված կադրերի համաձայն՝ Մերկելն արդեն ժամանել է Ալեքսանդրովսկի այգի, որտեղ ծաղկեպսակ կդնի Անհայտ զինվորի գերեզմանին:
Ինչպես ավելի վաղ հայտնել է Կրեմլի մամուլի ծառայությունը, Ռուսաստանի և Գերմանիայի ղեկավարները պլանավորում են քննարկել տարբեր ոլորտներում երկկողմ համագործակցության զարգացման վիճակն ու հեռանկարները, ինչպես նաև քննարկել մի շարք հրատապ միջազգային և տարածաշրջանային հարցեր:
Պուտինի և Մերկելի ներկայիս հանդիպումը կորոնավիրուսի պանդեմիայի սկսվելուց ի վեր առաջին դեմ առ դեմ հանդիպումն է լինելու: Նախորդ անգամ նրանք հանդիպել են 2020 թվականի հունվարի 19-ին Բեռլինում ՝ Լիբիայի վերաբերյալ միջազգային խորհրդաժողովում։ Հավանաբար, Մերկելի այցը Մոսկվա կդառնա նրա վերջին այցը Ռուսաստան Գերմանիայի կանցլերի կարգավիճակով, քանի որ սեպտեմբերին կայանալիք խորհրդարանական ընտրություններում նա չի առաջադրի իր թեկնածությունն այդ պաշտոնում:
