ԱՄՆ նախագահ Ջո Բայդենը հայտարարել է, որ երկիրն այժմ գտնվում է «չպատվաստվածների համավարակի» վիճակում, հաղորդում է Սպիտակ տունը:
Բայդենը նշել է, որ երկրում 85 միլիոն մարդ դեռ չի պատվաստվել կորոնավիրուսի դեմ և գտնվում է հիվանդանալու լուրջ վտանգի մեջ: ԱՄՆ նախագահը նրանց կոչ է արել պատվաստվել: Նա հայտնել է, որ ԱՄՆ-ում կորոնավիրուսով հոսպիտալացման բոլոր դեպքերն, ըստ էության, բաժին են ընկնում այն մարդկանց, ովքեր չեն պատվաստվել:
«Լավ նորություն ևս կա՝ ավելի ու ավելի շատ մարդիկ են պատվաստվում: Ընդհանուր առմամբ, 1 ամիս առաջվա համեմատությամբ՝ շաբաթական նոր պատվաստումների թիվն աճել է ավելի քան 80 տոկոսով»,- ասել է Բայդենը:
Նա նաև պարտադիր է դարձրել տարեցների խնամքի կենտրոնների աշխատակիցների պատվաստումները: Ըստ ԱՄՆ նախագահի՝ համավարակի սկզբից ի վեր ծերանոցներում ապրող շուրջ 130 հազար մարդ է մահացել կորոնավիրուսից:
ԱՄՆ-ն COVID-19-ով հիվանդացածների և վիրուսից մահացածների թվով աշխարհում առաջին հորիզոնականում է: Համավարակի սկզբից ի վեր այնտեղ COVID-19 է հայտնաբերվել 38 միլիոնից ավելի մարդու մոտ: Վիրուսն ավելի քան 641 հազար մարդու կյանք է խլել: