Գորիսի փոխհամայնքապետ Իրինա Յոլյանի ձերբակալումը ոչ իրավաչափ է, լրագրողների հետ զրույցում հայտարարեց վերջինիս պաշտպան Էրիկ Ալեքսանյանը։
«Նոր Քրեական դատավարության օրենսդրության կարգավորման համաձայն՝ ձերբակալման պատճառներից մեկը հանդիսանում է որպես խափանման միջոց կալանավորումն ընտրելու վերաբերյալ քննարկմանը դատարան ներկայացնելու նպատակով։ Ձերբակալման արձանագրության մեջ մենք նշեցինք, որ այդ պատճառն այնքանով գոյություն չունի, որ քննիչի կողմից այդ նպատակի իրագործումն իրականում հայեցողական իրավունք է։ Մյուս հայեցողական իրավունքն այդ նպատակի իրագործման շրջանակներում՝ համապատասխան ծանուցմամբ հրավիրելն ու տեղեկացնելն է, որ մեղադրյալի նկատմամբ պետք է քննարկվի կալանավորման հարցը։ Մենք քննիչին հարց ենք ուղղում՝ ինչո՞վ է պայմանավորված, որ կիրառվում է ավելի ոչ բարենպաստ հայեցողական իրավունքը։ Մեզ չներկայացրին որևէ փաստական տվյալ, որևէ հիմնավորված դատողություն այն մասին, որ ավելի հայեցողական իրավունքի իրագործումը չի լինի արդարացված։ Մենք գտնում ենք, որ ձերբակալման արձանագրությունը կազմվել է ոչ իրավաչափ ձևով», – ասաց պաշտպանը։
