Մամուլի փոխանցմամբ, երեկ ՀՀ կառավարությունում 1,5 ժամանոց հանդիպում են ունեցել ՀՀ վարչապետ Նիկոլ Փաշինյանն ու ԲՀԿ առաջնորդ Գագիկ Ծառուկյանը: Նշվում է, որ չի բացառվում, որ Ծառուկյանին սպորտային ոլորտի մասով ինչ-որ բան Փաշինյանը տա, քանի որ նրանց վերջին հանդիպման ժամանակ որոշվել է փոխհամագործակցել տարբեր ոլորտներում: Նման մի հանդիպում եղել էր ընտրություններից հետո: Ակնհայտ է, որ ԲՀԿ-ն իր երբեմնի կոշտ հռետորաբանությունից անցում է կատարում ավելի մեղմ հռետորաբանության:
Քաղաքագետ Արմեն Վարդանյանն «Առաջին լրատվական»-ի հետ զրույցում նշեց, որ ոչ միայն ԲՀԿ-ն, այլև գրեթե բոլոր արտախորհրդարանական ուժերը փորձում են իշխանությունների հետ լավ հարաբերությունների մեջ մնալ. «Արտախորհրդարանական ուժերը չեն ուզում լուսանցքում հայտնվել, փորձում են թեկուզ ինչ-որ օրակարգով իշխանության հետ խոսել: Դա կա նաև ԲՀԿ-ի դեպքում, բայց ԲՀԿ-ի դեպքում, ի տարբերություն այլ արտախորհրդարանական ուժերի, կա նաև Գագիկ Ծառուկյանի ֆինանսների հարցը: Ես կարծում եմ, որ Գագիկ Ծառուկյանը փորձում է իր բիզնեսներն ապահովագրել այն պարագայում, երբ անընդհատ կոռուպցիոն բացահայտումներ են տեղի ունենում: Գագիկ Ծառուկյանը, ամենայն հավանականությամբ, փորձում է ընդհանրապես քաղաքական գործունեությունից տեղափոխվել բիզնես դաշտ»,-ասաց նա:
Արմեն Վարդանյանի խոսքով, ԲՀԿ-ն միշտ էլ փորձել է կոմֆորտ զոնայում տեղավորվել. «ԲՀԿ-ն միշտ իշխանությունների հետ այս կամ այն ձևով լեզու է գտել: Եղել են ժամանակներ, երբ ԲՀԿ-ն կառուցողական դաշտից տեղափոխվել է ավելի ագրեսիվ, ավելի արմատական դաշտ, բայց դա որպես կանոն շատ կարճ է տևել, և իշխանության հակազդեցության պայմաններում ԲՀԿ-ն նորից վերադարձել է կառուցողական դաշտ: Հիմա ընդհանրապես ԲՀԿ-ն ռեսուրս չունի իշխանությանը հակազդելու, ընդդիմադիր դաշտի առաջամարտիկը դառնալու: Ստեղծված պայմաններում միակ ելքը իրենք տեսնում են իշխանության հետ համագործակցության մեջ: Այս կուսակցությունն այլևս խորհրդարանական ուժ չէ, և այդ ուժի լիդերը կարծես թե երկրի ղեկավար դառնալու ամբիցիաներ չունի: Ստեղծված պայմաններում իրենք էլ շատ լավ հասկանալով իրավիճակը, փորձում են կառուցողականության, փոխադարձ հարգանքի, կոմպրոմիսների դաշտում իշխանության հետ հարաբերվել»:
Անդրադառնալով տեսակետին, որ խորհրդարանական ընդդիմությունն էլ աստիճանաբար կգնա կառուցողական դաշտ, Արմեն Վարդանյանն ասաց, որ ինքը այս պահին նման ազդակներ չի տեսնում. «Խորհրդարանական ընդդիմությունը դեռ հայտարարում է, որ իրենք արմատական են տրամադրված և կառուցողականության դաշտ չեն մտնելու: Դա իրենց իրավունքն է, ամեն մեկն ինքն է որոշում, թե ինչ պայքարով հասնի իր նպատակներին: Հաջորդ ընտրություններին դրա արդյունքները մենք կտեսնենք»:
Պնդմանը, թե այս խորհրդարանը 5 տարի չի գործելու և մենք նորից կանգնելու ենք արտահերթ ընտրությունների առջև, քանի որ այս կազմով ԱԺ-ն պարզապես չի կարողանալու աշխատել, քաղաքագետն ասաց. «Թե որքան կտևի այս խորհրդարանի գործունեությունը, կախված է ոչ այնքան խորհրդարանից, կամ կառավարությունից, որքան արտաքին մարտահրավերներից: Եթե Հայաստանը նորից հայտնվի տուրբուլենտ իրավիճակներում, և եթե նորից քաղաքական մեծ ճգնաժամ առաջանա, որը անհնար լինի լուծել ներկա իրականության պայմաններում, ապա բնականաբար, տեղի կունենա արտահերթ ընտրություններ: Կրկնեմ, դա կախված չի լինելու խորհրդարանի գործունեությունից, նրա որակից, ոչ էլ կառավարությունից»:
Հարցին, թե սահմաններին տիրող լարված իրավիճակը որքանով կարող է նպաստել ներքին լարվածության աճին՝ հաշվի առնելով, որ ԱԺ-ն փակ քննարկում է նախաձեռնել, արդյոք գոնե անվտանգության հարցում հնարավոր կլինի միասնական դիրքորոշում ունենալ, Արմեն Վարդանյանը պատասխանեց. «Ես հուսով եմ, որ միասնական դիրքորոշում կունենան, չնայած ԱԺ-ում կան ընդդիմադիր գործիչներ, որոնք լրիվ այլ կանոններով են գործում: Սակայն կան նաև գործիչներ, որոնք պետական մտածելակերպ ունեն, որոնք երկրի շահը անձնական շահից ցածր չեն դասում: Այդ մարդկանց հետ կարող են ունենալ միասնական դիրքորոշում»:
