Եվրոպական միությունը պատրաստ է աջակցել Հայաստանին և Ադրբեջանին պետական սահմանի սահմանազատման և սահմանագծման գործում, հայտարարել է Հարավային Կովկասում և Վրաստանի ճգնաժամի հարցերի Եվրոպական Միության հատուկ ներկայացուցիչ Տոյվո Կլաարը: «Հայ-ադրբեջանական պետական սահմանից շարունակվում են մտահոգիչ լուրերը զոհերի մասին: Վերահաստատում ենք անհապաղ ապաէսկալացիայի, զսպվածության, սահմանազատման և սահմանագծման գործընթաց սկսելու վերաբերյալ մեր կոչը: Պատրաստ ենք աջակցել», նշել է Կլաարը Թվիթերում:
Եվրամիությունից, նաև այլ կառույցներից և պետություններից հնչում են այդօրինակ հայտարարություններ ոչ առաջին անգամ: Սակայն ամբողջ հարցն այն է, թե ինչ է իրենից ներկայացնում այդ աջակցությունը, որ խոստանում է օրինակ Եվրամիությունը: Կամ, ինչպե՞ս է այդ աջակցությունը պատկերացնում Եվրամիությունը: Եթե աջակցության պատրաստակամության մասին հայտարարություններին զուգահեռ հնչեն նաև առարկայական պատկերացում տվող կոնկրետ հանգամանքներ, ապա դա թերևս թույլ կտա առնվազն հանրություններին ավելի կոնկրետ գնահատել այդ պատրաստակամությունն ու ըստ այդմ նաև դրա հանդեպ ձևավորել քաղաքական իշխանությունների պատասխանատվությունը:
Մասնավորապես, Հայաստանի հանրությանն օրինակ կարող է հետաքրքրել, թե սահմանագծման ու սահմանազատման գործում աջակցության պատրաստ Եվրամիությունն ի՞նչ հիմքով է պատկերացնում այդ գործընթացը: ԽՍՀՄ քարտեզնե՞րն են դիտարկվելու հիմք Եվրամիության համար, թե՞ Եվրամիությունն ունի այլ՝ իր հիմքերը: Որո՞նք են դրանք, ի՞նչ են ենթադրում: Ի վերջո, աջակցությունը պետք է ունենա կոնկրետ տեսք, որպեսզի պահանջի կոնկրետ պատասխան, և հանրությունն էլ ունենա այդ իրավիճակը կոնկրետ գնահատելու հնարավորություն, իսկ այլ սուբյեկտներ էլ չունենան այդ ամենը նենգափոխելու և դրա վրա մանիպուլյատիվ քաղաքական խաղեր կառուցելու հնարավորություն: Ըստ այդմ, սահմանագծման ու սահմանազատման գործընթացում աջակցության պատրաստ Եվրամիությունը որքանո՞վ է պատրաստ առնվազն հանրություններին շատ, թե քիչ առարկայորեն ներկայացնել իրենց պատրաստակամության բովանդակությունը, հիմքը և շահեկանությունը, թեկուզ օրինակ ՌԴ պատրաստակամության համեմատ:
