Ուզբեկստանի հակաօդային պաշտպանության համակարգը Աֆղանստանի ռազմաօդային ուժերին պատկանող ինքնաթիռ է խոցել, երբ վերջինս փորձել է խախտել սահմանը: РИА Новости գործակալության փոխանցմամբ՝ այս մասին հայտնել են Ուզբեկստանի պաշտպանության նախարարությունից:
Երկուշաբթի օրը համացանցում տարածվել են լուսանկարներ և կադրեր, որոնցում երևում են ենթադրաբար Աֆղանստանի ռազմաօդային ուժերի կործանված ինքնաթիռի բեկորները: Նշվում է, որ միջադեպը տեղի է ունեցել Սուրխանդարի մարզի Շերաբադի շրջանում՝ օգոստոսի 15-ի երեկոյան:
Ուզբեկստանի պաշտպանության նախարարությունը РИА Новости-ին հաստատել է ինքնաթիռի կողմից սահմանը խախտելու և դրա կործանման մասին տեղեկությունները՝ նշելով, որ կատարվում է հետաքննություն: Արտակարգ բժշկական օգնության բաժանմունքից գործակալությանը հայտնել են, որ երկու օդաչուները ողջ են մնացել և գտնվում են Թերմեզի հիվանդանոցում, նրանց վիճակը ծանր է:
Մի քանի շաբաթ առաջ, Աֆղանստանից ամերիկյան զորակազմի դուրսբերման ֆոնին, իրավիճակը հանրապետությունում կտրուկ վատթարացել էր. թալիբները հարձակում էին սկսել խոշոր քաղաքների վրա: Իսկ կիրակի ավելի ուշ «Թալիբանի» զինյալները գրավել էին Քաբուլը: Նրանք հայտարարել էին Աֆղանստանում պատերազմի ավարտի մասին: Երկրի նախագահ Աշրաֆ Ղանին փախել է Աֆղանստանից՝ իր քայլը բացատրելով նրանով, որ ցանկանում է խուսափել արյունահեղությունից: