Ահաբեկչական կազմակերպությունների ցուցակից «Թալիբանը» դուրս բերելու ընթացակարգ սկսելու համար ՄԱԿ-ի Անվտանգության խորհրդի բոլոր անդամները պետք է համոզվեն, որ Աֆղանստանի նոր իշխանություններն իրենց քաղաքակիրթ են պահում: РИА Новости գործակալության փոխանցմամբ՝ այս մասին հայտարարել է ՌԴ նախագահի հատուկ ներկայացուցիչ, ԱԳՆ Ասիայի երկրորդ բաժանմունքի ղեկավար Զամիր Կաբուլովը «Ռոսիա 24» հեռուստաալիքի եթերում:
Ավելի վաղ РИА Новости-ին տված հարցազրույցում նա նշել էր, որ առայժմ, չնայած Աֆղանստանում թալիբների առաջխաղացմանը և նրանց կողմից երկրի փաստացի վերահսկողությանը, չի կարելի խոսել նրանց այդ ցուցակից հանելու մասին:
Մի քանի շաբաթ առաջ, Աֆղանստանից ամերիկյան զորակազմի դուրսբերման ֆոնին, իրավիճակը հանրապետությունում կտրուկ վատթարացել էր. թալիբները հարձակում էին սկսել խոշոր քաղաքների վրա: Իսկ կիրակի ավելի ուշ «Թալիբան»-ի զինյալները գրավել էին Քաբուլը: Նրանք հայտարարել էին Աֆղանստանում պատերազմի ավարտի մասին: Երկրի նախագահ Աշրաֆ Ղանին փախել է Աֆղանստանից՝ իր քայլը բացատրելով նրանով, որ ցանկանում է խուսափել արյունահեղությունից: