ՀՀ Արդարադատության նորանշանակ նախարար Կարեն Անդրեասյանը օրերս հայտարարեց, որ հիմա փորձում են գտնել ամենաարդար մոդելը՝ վատ դատավորներին համակարգից դուրս մղելու։ Նախարարը նաև ասել է, որ մարտի 1-ի գործերով 24 դատավորներից համակարգում մնացել են 12-ը։ Անդրեասյանի խոսքով՝ տեղի է ունեցել տարօրինակ զտում, ազատում այն դատավորներից, որոնք կասկածելի վճիռներ են կայացրել մարտի 1-ի գործերով։ «Դուք կարող եք տեսնել, որ ինքնաբերաբար տեղի է ունեցել որոշակի զտում։ բայց այն դատավորը, որը կոռումպացված է, անգրագետ է իմ զեկույցից հետո էլ մնացել են ու շարունակել ենք հանցագործություններ թույլ տալ։ Բայց մեր օրենսդրությունը ինձ թույլ տալիս է 8 տարի հետ գնալ ու վարույթներ հարուցել վերջին 8 տարվա ընթացքում թույլ տրված խախտումների ու սխալների համար։ Եվ ես շնորհակալ եմ նախորդ նախարարներին, պարոն Բադասյանին, որ ինքը նման ժառանգություն է թողել և ես կարող եմ իմ կիսատ գործը ավարտին հասցնել»,-ասաց նախարարը։ Թեմայի շուրջ «Առաջին լրատվական»-ը զրուցել է ՀԱԿ վարչության անդամ Արմեն Խաչատրյանի և փաստաբան Գևորգ Դավթյանի հետ:
Արմեն Խաչատրյանի կարծիքով՝ Կարեն Անդրեասյանի ասածը տարօրինակ է. գործիքակազմը միշտ եղել է. «Հեքիաթներ թող չպատմեն, եթե լիներ իշխանության կամքը կունենայինք անկախ դատական համակարգ:Հոտած ջրին ինչքան ուզում ես թարմ ջուր ավելացրու. իշխանությունը դատական համակարգում չի գնում համարձակ քայլերի»:
Մեր բանախոսների կածիքով՝ դատական համակարգում համակարգային փոփոխություններ են պետք:
