Այսօր «Հանուն Հանրապետության» կուսակցության արտահերթ համագումարն էր։ Կուսակցության նախագահ ընտրված Արման Բաբաջանյանը «Առաջին լրատվական»-ի հետ զրույցում ասաց, որ արտահերթ համագումար հրավիրելու անհրաժեշտությունը պայմանավորված էր արտահերթ խորհրդարանական ընտրություններից հետո ստեղծված նոր իրողություններով, որոնք ծառացած են երկրի առաջ։ Այս նոր իրողությունների պայմաններում ավելի ճկուն, ավելի մոբիլ լինելու համար անհրաժեշտ էր կուսակցության աշխատանքներն ակտիվացնել, կառուցվածքային փոփոխություններ իրականացնել։
Բաբաջանյանն ասաց, որ առաջիկայում պատրաստվում են շատ ակտիվ լինել, մասնակցել ՏԻՄ ընտրություններին։ «Այս ՏԻՄ ընտրությունները մենք օգտագործելու ենք մեր կուսակցության մասին իրազեկելու, մեր կուսակցության նպատակների մասին հիշեցնելու համար։ Այս պահին էլ այլ ուժերի հետ քաղաքական համագործակցության տարբերակներ ենք փնտրում»,-ասաց Բաբաջանյանը։
Նախկին պատգամավորը անդրադարձավ նաև Ազգային ժողովի նիստերին, նկատեց, որ դժվարանում է ասել, թե ավելի մեծ սպառնալիք արտաքին թշնամին է ներկայացնում, թե ԱԺ-ում հայտնված այն երկու միավորները։ Նրա խոսքով ստեղծված իրավիճակը արտախորհրդարանական ուժերի համար նոր դաշտ է ստեղծում, քանի ո հնարավոր չէ հաշտվել այդ իրողության հետ։
Բաբաջանյանը մեզ հետ զրույցում կանխատեսեց նոր արտահերթ ընտրություններ՝ նշելով, որ արդեն իսկ ակնհայտ է, որ այս Ազգային ժողովը չի կարող երկար կյանք ունենալ։ «Ակնհայտորեն և համոզված կարող ենք ասել, որ այս խորհրդարանը չի կարող իր գործունեության սահմանված ժամկետը իրացնել։ Երկու շաբաթը բավարար էր այդ ուժերի իրական նպատակները տեսնելու համար։ Մենք դրսից պայքարելու ենք նրանց նպատակները օրորոցում խեղդելու, վիժեցնելու համար։ Գործընթացները, որոնք ավելի ու ավելի խորացնելու են ներքաղաքակն ճգնաժամը անխուսափելի է դարձելու նոր արտահերթ ընտրությունները»,-ասաց Բաբաջանյանը