Աֆղանստանի նախագահ Աշրաֆ Հանին շաբաթ օրը հայտարարել է, որ հրատապ խորհրդակցություններ են անցկացվում կառավարական ուժերի և «Թալիբան» շարժման միջև հրադադարի հասնելու համար:
Ինչպես հաղորդում է Agence France-Presse-ը, նա այդ մասին հայտարարել է Քաբուլում ունեցած իր ելույթում:
«Շտապ շփումներ են հաստատվում պատերազմը դադարեցնելու համար», – ասել է Հանին:
Ինչպես ավելի վաղ հայտնել էր Al Hadath-ը, Աֆղանստանում ԱՄՆ հատուկ ներկայացուցիչ Զալմայ Խալիլզադը Աֆղանստանի կառավարությանը և թալիբներին փոխանցել էր «ռազմական առճակատումը դադարեցնելու ծրագիր»: Այս փաստաթուղթը մշակվել է Աֆղանստանի խաղաղ կարգավորման վերաբերյալ ընդլայնված խորհրդակցություններից հետո, որոնք տեղի են ունեցել այս շաբաթ՝ Դոհայում:
Ինչպես հայտնել ենք, Աֆղանստանի մայրաքաղաք Քաբուլում ԱՄՆ դեսպանատան աշխատակիցներին հանձնարարվել է սկսել գաղտնի փաստաթղթերի, ինչպես նաև պետական դրոշի կամ ամերիկյան գերատեսչությունների լոգոտիպների պատկերներով առարկաների ոչնչացումը։
ԱՄՆ նախագահ Ջո Բայդենն Աֆղանստանում տիրող իրավիճակի հարցով հանդիպում է անցկացրել։
Իսկ երեկ ՄԱԿ-ի գլխավոր քարտուղար Անտոնիու Գուտերեշը հայտարարել էր Աֆղանստանում իրադրության՝ վերահսկողությունից դուրս գալու մասին։
Թալիբներն իրենց հերթին հավաստիացրել են Աֆղանստանի հարևան երկրների, ինչպես նաև Իսլամական Հանրապետությունում գտնվող օտարերկրյա դիվանագիտական առաքելությունների և միջազգային կազմակերպությունների անդամների համար սպառնալիքի բացակայության մասին։
