ՖԻՖԱ-ի դասակարգման աղյուսակում Հայաստանի ազգային հավաքականը առաջադիմելով երկու կետով հանգրվանել է 88-րդ հորիզոնականում։ Պաշտոնական վերջին 5 հանդիպումներում մեր հավաքականը նույնքան հաղթանակ է տարել, ինչը աննախադեպ արդյունք է։ 2022 թվականի աշխարհի առաջնության ընտրական փուլում էլ մերոնք 3-րդ տուրից առաջ գլխավորում են J ենթախմբի մրցաշարային աղյուսակը։ Հիշեցնենք, որ հունիսի սկզբին Խոակին Կապառոսի գլխավորած թիմը անցկացրեց նաև ընկերական հանդիպումներ, ոչ-ոքի 1։1 խաղալով աշխարհի փոխչեմպիոն Խորվաթիայի հետ և 1։3 հաշվով զիջելով Շվեդիային։ Սեպտեմբերի սկզբին Հայաստանի հավաքականը ընտրական փուլի ևս երեք հանդիպում կանցկացնի։ Սեպտեմբերի 2-ին մերոնք Սկոպիեյում կմրցեն Հյուսիսային Մակեդոնիայի հետ, իսկ երեք օր անց կհյուրընկալվեն աշխարհի քառակի չեմպիոն Գերմանիային։
Սեպտեմբերին 8-ին էլ մեր հավաքականը Վազգեն Սարգսյանի անվան «Հանրապետական» մարզադաշտում կմրցի Լիխտենշտեյնի հետ։ Մեր առաջիկա մրցակիցը՝ Հյուսիսային Մակեդոնիան նախորդ ամսվա համեմատ նահանջել է միանգամից 10 հորիզոնականով և այժմ 72-րդն է։ Հիշեցնենք, որ մակեդոնացիները մասնակցեցին Եվրո-2020-ին և խմբային փուլում երեք խաղում կրելով նույնքան պարտություն դուրս մնացին հետագա պայքարից։ Գերմանիայի ազգային հավաքականը նախորդ հրապարակման համեմատ տեղաշարժի չի ենթարկվել և շարունակում է մնալ 16-րդ հորիզոնականում։ Նշենք, որ Եվրո-2020-ի ավարտից հետո թե Գերմանիայի և թե Հյուսիսային Մակեդոնիայի հավաքականի գլխավոր մարզիչները հեռացան զբաղեցրած պաշտոնից։ Լիխտենշտեյի ազգային թիմը նախորդ ամսվա համեմատ նահանջել է 3 հորիզոնականով և հիմա 189-րդ էր։ Հիշեցնենք, որ աշխարհի առաջնության ընտրական փուլի մեկնարկային խաղում մեր հավաքականը հյուրընկալվելիս հաղթել էր Լիխտենշտեյին 1։0 հաշվով։ Ինչև, ԱՊՀ երկրների կտրվածքով Հայաստանի հավաքականն այս պահին երրորդն է։ Մերոնք զիջում են միայն Ռուսաստանին և Ուկրաինային։ Վերջինս 25-րդն է, իսկ ռուսները՝ 41-րդը։ Հայաստանի հավաքականին հաջորդում է Բելառուսը՝ որը 89-րդն է, իսկ Վրաստանը՝ 91-րդն է։
Վերջին երեք ամիսների ընթացքում Վրաստանի ազգային թիմը դասկարգման աղյուսակում տեղաշարժի չի ենթարկվել։ Տարածաշրջանի կտրվածքով ևս Հայաստանի հավաքականը երրորդն է։ Մեր գլխավոր թիմը զիջում է Թուրքիային և Իրանին։ Վերջինս վերինս 26-րդ տեղում է, իսկ թուրքերը՝ 39-րդ։ Ադրբեջանի հավաքականը շարունակում է անկում ապրել վարկանիշային աղյուսակում և այս պահին 112-րն է։ Նախորդ ամսվա համեմատ ադրբեջանցիները նահանջել են երկու հորիզոնականով։ Ինչևէ ՖԻՖԱ-ի դասակարգման աղյուսակը շարունակում է գլխավորել Բելգիայի ազգային հավաքականը։ Բրազիլիայի հավաքականը երկրորդն է, իսկ լավագույն եռյակը եզրափակում է աշխարհի գործող չեմպիոն Ֆրանսիան։
Եվրոպայի փոխչեմպիոն Անգլիան չորրորդն է, իսկ Եվրոպայի չեմպիոն իտալացիները՝ միայն 5-րդը է։ 6-րդ տեղում Արգենտինան է, որին հաջորդում են Իսպանիան, Պորտուգալիան, Մեքսիկան և ԱՄՆ-ն։