Աֆղանստանի արևմուտքի Ֆարահի նահանգի նահանգապետը հանձնվել է «Թալիբան» արմատական շարժման զինյալներին, որոնք վերջին օրերին ակտիվ հարձակում են սկսել այդ տարածաշրջանում: Օգոստոսի 12-ին այդ մասին հաղորդել է Pajhwok գործակալությունը՝ վկայակոչելով Աֆղանստանի անվտանգության ծառայությունների աղբյուրներ, տեղեկացնում է «Արմենպրես»-ը:
Ինչպես նշվում է, նահանգապետի հետ մեկտեղ հանձնվել են նրա տեղակալը և տարածաշրջանային վարչակազմի այլ պաշտոնյաներ: Ըստ որում, ընդամենը թալիբներին են հանձնվել հինգ ղեկավարներ, իսկ նահանգապետի վարչության ևս չորս աշխատակիցներ փախել են Իրան:
Բացի դրանից, գործակալությունը հայտնում է, որ Ֆարահում Աֆղանստանի ազգային բանակի բրիգադը նույնպես վայր է դրել զենքը թալիբների ուժերի առջև:
Ապրիլի 14-ին ԱՄՆ-ի նախագահ Ջո Բայդենը հայտարարել է Աֆղանստանում գործողությունն ավարտելու որոշման մասին, որը դարձել է ամենաերկարատև արտասահմանյան ռազմարշավն ամերիկյան պատմության մեջ: Այդ ֆոնին հանրապետությունում տեղի է ունեցել անվտանգության բնագավառում իրադրության կտրուկ վատթարացում՝ կապված այն բանի հետ, որ «Թալիբանի» զինյալները սաստկացրել են մի շարք ուղղություններով հարձակման տեմպերը:
Մի շարք բաց աղբյուրների տվյալների, ինչպես նաև իրենց իսկ թալիբների պնդումների համաձայն՝ արմատականները վերահսկում են երկրի տարածքի 65-ից մինչև 85 տոկոսը, ներառյալ շրջանները հինգ պետությունների՝ Իրանի, Չինաստանի, Պակիստանի, Տաջիկստանի և Թուրքմենստանի հետ սահմանների երկայնքով: