«Թալիբան» շարժումը գրավել է Աֆղանստանի մայրաքաղաք Քաբուլից 150 կմ հարավ գտնվող, ռազմավարական նշանակություն ունեցող Ղազնի քաղաքը, հաղորդում է The Guardian պարբերականը: Քաղաքի վրա հարձակումը սկսվել է կեսգիշերին մոտ, այնուհետև փողոցներում բախումներ են տեղի ունեցել թալիբների և անվտանգության ուժերի միջև: Առավոտյան քաղաքը հանձնվել է:
Ղազնին դարձել է վերջին մեկ շաբաթում թալիբների գրաված նահանգային 10-րդ մայրաքաղաքը: Ըստ լրատվամիջոցի՝ սա մեծ հարված է Աֆղանստանի կառավարության համար, քանի որ քաղաքը գտնվում է Քաբուլը երկրի հարավին կապող մայրուղու վրա: Մարտերը շարունակվում են նաև աֆղանական այլ խոշոր քաղաքների մոտ:
Թալիբները վերջին շաբաթվա ընթացքում բանտերից ազատ են արձակել իրենց հարյուրավոր անդամների՝ համալրելով իրենց շարքերը և միևնույն ժամանակ տիրանալով ԱՄՆ-ի կողմից մատակարարված զենքերի և մեքենաների:
Նախօրեին, թալիբների առաջխաղացման ֆոնին Աֆղանստանի նախագահը զինված ուժերի ղեկավարի պաշտոնում նոր գեներալի է նշանակել:
Թալիբների առաջխաղացման հետ հազարավոր մարդիկ փախել են Քաբուլ և այժմ ապրում են բաց երկնքի տակ:
Աֆղանստանի անվտանգության ուժերին օգնում է ամերիկյան ավիացիան: Ըստ ամերիկյան ռազմական հետախուզության գնահատականի՝ Քաբուլը կարող է առաջիկա 30 օրերին հայտնվել «Թալիբանի» կրակի տակ, իսկ երկիրը կարող է թալիբների լիակատար հսկողության տակ հայտնվել մի քանի ամսվա ընթացքում: