«Դելֆինների բանտարկումն այս տարածքում անմարդկային և անօրինական արարք է, բացի այդ, պանթեոնում թաղված են հայազգի նշանավոր և աշխարհահռչակ մարդիկ, ինչը դելֆինարիումի կառուցումն այս տեղանքում դարձնում է մշակութային և էսթետիկական առումով անհարիր»,- մի խումբ բնապահպաններ իրենց նամակով դիմում են ՀՀ նախագահին, վարչապետին, բանպահպանության նախարարին և քաղաքապետին:
«Մեր տեղեկություններով` կառույցի համար ծրագրվում է Ուկրաինայից Հայաստան ներկրել 4 շշաքիթ դելֆին, որոնք գրանցված են Ուկրաինայի վտանգված կենդանիների ու բույսերի կարմիր գրքում»,-իր խոսքում նշեց «Էկոդար» ՀԿ-ի նախագահ Հրայր Սավզյանը:
Պարոն Սավզյանն ավելացրեց նաև, որ անազատության մեջ դելֆինները շատ հաճախ տառապում են խոցերից և ագրեսիվ վերաբերմունք դրսևորում իրենց ցեղակիցների և մարդկանց հանդեպ:
Ասուլիսին ներկա «Аrmenian Environmental network»-ի գործադիր տնօրեն Սերդա Էոզբենյանն ավելացրեց, որ իրենք նույնպես դեմ են դելֆինարիումի կառուցմանը, քանզի այն օգուտ չի բերի հայ հասարակությանը և կտանջի այդ խելացի կենդանիներին: «Հայաստանը պետք է ճիշտ որոշում կայացնի ոչ միայն դադարեցնել դելֆինարիումի կառուցումը, այլ նաև միանա այն երկրների ցուցակին, որոնք դեմ են այս գործունեությանը: Հայստանը պետք է սա անի հանուն դելֆինների, հանուն իր ժողովրդի»,- իր խոսքը եզրափակեց Սերդա Էոզբենյանը:
«Թռչնասերների կենտրոն» ՀԿ-ի նախագահ Սիվա Ադամյանը հիշեցրեց, որ իրենք նամակ էին ուղարկել թե քաղաքապետարան, թե բնապահպանության նախարարություն, սակայն քաղաքապետարանից այդպես էլ պատասխան չստացան. նամակում խնդրել էին ներկայացնել այն բոլոր փասթաթղթերի փաթեթը, որոնք կարող էին վկայակոչել այն, որ դելֆինարիումը կառուցվում է օրենքի սահմաններում:
Իսկ Ժառանգություն խմբակցության ղեկավար Ստեփան Սաֆարյանը նշեց, որ թե՛ կառուցապատողը, թե՛ պետությունը պետք է հրաժարվեն այս գաղափարից: