Ֆրանսիայի նախագահ Էմանուել Մակրոնի աշխատակազմը տեղեկություն է տարածել Ֆրանսիայի նախագահի և Բաքվի ղեկավար Իլհամ Ալիևի հեռախոսազրույցի մասին: Ելիսեյան պալատի հաղորդագրության համաձայն, Մակրոնն ու Ալիևը պայմանավորվել են գործակցել ռեգիոնալ կայունության համար, հենվելով Մինսկի խմբի համանախագահության աջակցության վրա: Նշանակո՞ւմ է դա արդյոք, որ Ալիևը ընդունում է Մինսկի խմբի ձևաչափի վերականգնումը:
Քաղաքագետ Անդրիաս Ղուկասյանի կարծիքով՝ Ադրբեջանի, Ռուսաստանի ու Թուրքիայի ցանկությունը՝ ձախողել Մինսկի խմբի գործունեությունը Արցախի կարգավիճակը որոշելու հարցում, ըստ էության, տապալված է․«Նոյեմբերին լրանում է Պուտին-Բայդեն հանդիպման ժամանակ սահմանված ժամկետը, երբ Ռուսաստանի Դաշնությունը պետք է իր դիրքորոշումը ԵԱՀԿ-ի ու Հելսինկյան եզրափակիչ ակտի նկատմամբ կատարի ու ըստ այդմ փոփոխություններ կլինեն նաև տարածաշրջանային քաղաքականության մեջ՝ այդ թվում նաև արցախյան հարցում»,-«Առաջին լրատվական»-ի հետ զրույցում ասաց նա։
Ինչ վերաբերում է Ռուսաստանի կողմից՝ ԵԱՀԿ Մինսկի խմբի ֆորմատը վերականգնելու մասով հնարավոր խոչընդոտներին, Անդրիաս Ղուկասյանն ասաց․ «Իհարկե դա հարթ գործընթաց չէ։ Ո՛չ Ադրբեջանը և ոչ էլ Թուրքիան չեն հրաժարվի իրենց կողմից առաջ բերվող պահանջներից։ Այսօր, ըստ էության, միջազգային հանրությունն՝ ի դեմս Ֆրանսիայի ու ԱՄՆ-ի պահանջում է սահմանին տեղակայել միջազգային խաղաղարար ուժեր։ Հասկանալի է, որ ո՛չ Թուրքիայի և ո՛չ էլ Ադրբեջանի համար դա հեշտ գործընթաց չէ։ Նույնը վերաբերում է նաև Ռուսաստանի Դաշնությանը»։
Մեր զրուցակիցը կարծում է, որ Ֆրանսիայի ու միջազգային հանրության ճնշումների արդյունքում է, որ փոխվեց Ադրբեջանի դիրքորոշումը․ «Ադրբեջանի և Թուրքիայի քաղաքականության փոփոխությունը՝ ԱՄՆ-ի ու Ֆրանսիայի ճնշման արդյունք է՝ Ռուսաստանի, Թուրքիայի ու Ադրբեջանի վրա»։
Արդյոք այդ ճնշումները հնարավոր պատժամիջոցների սահմանման տեսքով պետք է լինեին, հարցին ի պատասխան Անդրիաս Ղուկասյանն արձագանքեց․ «Պատժամիջոցները այն գործիքներն են, որոնք որպես կանոն օգտագործվում են նման իրավիճակներում, երբ կա խնդիր պաշտպանել միջազգային իրավունքը։ Եվ բնականաբար այդ գործիքը հանդիսանում է ճնշման գլխավոր գործոնը»,-եզրափակեց նա։
Քաղաքագետ Ռուբեն Մեհրաբյանի կարծիքով՝ միանշանակ է, որ Ադրբեջանի վրա կան ճնշումներ․«Մակրոն-Ալիև զրույցին հաջորդած Ադրբեջանի հայտարարությունները վկայում են, որ Բաքվում կա խիստ դժգոհություն։ Էրդողանի հետ Ալիևի խոսակցության ժամանակ նա բողոքել է Էրդողանին Հայաստանից, թե իբր Հայաստանը սադրանքներ է իրականացնում։ Դատելով այս ամենից՝այո Ֆրանսիայի կողմից բարձրաձայնվող կան որոշակի ճնշումներ։ Դրանք բարձրաձայնում է Ֆրանսիան, բայց այդ ճնշումը միայն Փարիզի կողմից չէ։ Այն նպատակ ունի Ադրբեջանին դուրս բերել «լեգիտիմ բեսպրիդելի» ռեժիմից»,-«Առաջին լրատվական»-ի հետ զրույցում ասաց նա։
Մեհրաբյանի խոսքերով՝այժմ Ալիևը հասկանում է, թե ինչու են իր վրա ճնշում գործադրում ու չի ուզում դուրս գալ այդ ռեժիմից․«Նա էլ իր հակաքայլերն է անում։ Երասխում նորից սկսել են կրակել։ Մեր Պաշտպանության նախարարությունը հաղորդագրությամբ է հանդես գալիս այդ մասին՝ նշելով, որ հայկական կողմը կրկին ստիպված է հակառակորդի կրակը ճնշելու գործողություններ իրականացնել»,-եզրափակեց նա։