Վրաստանի առողջապահության նախարար Էկատերինե Տիկարաձեն հայտարարում է, որ առողջապահության ոլորտն արդեն մահճակալների քանակի սպառման եզրին է: Հաղորդում է 1tv.ge-ն։
Ինչպես նշել է նախարարը, ամեն օր աշխատանքներ են տարվում, սակայն ռեսուրսները գնալով սպառվում են:
«Առողջապահության ոլորտում մենք իրականում մահճակալների քանակի սպառման եզրին ենք: Իհարկե, ամեն օր աշխատանքներ են տարվում, սակայն ռեսուրսը գնալով պակասում է: Նաև պետք է հաշվի առնել բժիշկների հոգնածությունը, ովքեր այս ռեժիմով աշխատում են ավելի քան մեկուկես տարի: Ես շատ հույս ունեմ մեր հասարակության իմաստության վրա, որ նրանք կկանգնեն առողջապահության նախարարության և յուրաքանչյուր բժշկի կողքին և, հետևաբար, ձեռնպահ կմնան կորոնավիրուսը խթանող գործունեությունից»,- ասել է Տիկարաձեն:
Վրաստանի Առողջապահության նախարար Էկատերինե Տիկարաձեն լրագրողների հետ զրույցում նշել է նաև, որ դիմակ կրելը ինչպես փակ, այնպես էլ բաց տարածքներում կարող է կրկին պարտադիր դառնալ:
Առողջապահության նախարարի խոսքով, համակարգող խորհրդի նիստը, որի ընթացքում կքննարկվի սահմանափակումների հարցը, տեղի կունենա հաջորդ երեքշաբթի:
