Աֆղանստանի կառավարության մամուլի կենտրոնի ղեկավար Դաու Խան Մինափալը սպանվել է Քաբուլում: Այս մասին Twitter-ում հայտնել է TOLOnews հեռուստաալիքը:
Սպանությունը տեղի է ունեցել Դար-ուլ-Աման պողոտայում: Այն հեռու չէ Աֆղանստանում Ռուսաստանի դեսպանատնից, հստակեցնում է NSN-ը:
Հարձակման պատասխանատվությունը ստանձնել է «Թալիբան» շարժումը, հայտնում է RT-ն:
ՌԴ ԱԳՆ տեղեկատվության և մամուլի վարչության փոխտնօրեն Ալեքսանդր Բիկանտովը հայտարարել է, որ Աֆղանստանում թալիբների հարձակողական գործողությունները սպառվում են, նրանք միջոցներ չունեն գրավելու խոշոր քաղաքներ, ինչպիսին է Քաբուլը։ Նա նաև նշել է, որ մի շարք նահանգներում կառավարական ուժերին հաջողվել է վերականգնել կորցրած տարածքների վերահսկողությունը:
Ավելի վաղ՝ օգոստոսի 3-ին, Աֆղանստանի ԱԳՆ ղեկավար Մոհամմադ Հանիֆ Աթմարը հայտարարել էր, որ Աֆղանստանի կառավարությունը պատրաստ է աշխատել Թալիբանի ներկայացուցիչների հետ և շարժումը դարձնել իշխանության անբաժանելի մասը միայն այն դեպքում, եթե շարժումը հրաժարվի ահաբեկչությունից: Նա նաև հավելել է, որ Աֆղանստանի կառավարությունը ողջունում է շարժման ներկայացուցիչների հետ այլ երկրների աշխատանքը, եթե այդ ջանքերը գործադրվեն՝ փորձելով համոզել զինյալներին խաղաղության և քաղաքական կարգավորման անհրաժեշտության մեջ:
Մոսկվան բազմիցս մտահոգություն է հայտնել Աֆղանստանում տիրող իրավիճակի կապակցությամբ: Հուլիսի 28-ին Ռուսաստանի պաշտպանության նախարար Սերգեյ Շոյգուն հայտարարեց, որ Աֆղանստանում Միացյալ Նահանգների առաքելությունը ձախողվել է: Նրա խոսքերով՝ իրավիճակը երկրում արագորեն վատթարանում է՝ գործնականում իշխանությունների վերահսկողությունից դուրս գալով, իսկ թալիբները վերահսկում են Աֆղանստանի տարածքի մեծ մասը:
ԱՄՆ-ն սկսել է զորքերի դուրսբերումը մայիսի սկզբին և նախատեսում է ավարտել այն օգոստոսի վերջին: Վաշինգտոնը մոտ 1000 զինծառայող կթողնի Քաբուլում՝ դիվանագետների և օդանավակայանի պահպանության համար: