Դեկտեմբերի 1-2-ը Աստանայում կայանալիք ԵԱՀԿ գագաթնաժողովում Ղարաբաղյան հարցում հնարավոր արդյունքների հասնելու մասին խոսելիս ԵԱՀԿ Խորհրդարանական վեհաժողովի նախագահի` Լեռնային Ղարաբաղի հակամարտության հարցերով հատուկ ներկայացուցիչ Գորան Լենմարկերը նկատեց, որ այդ գործընթացի համար իրավասու են Հայաստանի և Ադրբեջանի նախագահները և ինքը չի կարող դիտարկումներ անել հնարավոր արդյունքների մասին. «Ես չգիտեմ` իրականում քանի հանդիպում է եղել նախագահների միջև, և նրանք կարող են հանդիպել նաև տարեկան 100 անգամ, և պարզ չէ, թե նրանք ինչի կհանգեն, բայց խնդիրն այն է, որ պետք չէ գտնել հարցի տեխնիկական բոլոր լուծումները, քանի որ դա կարող է հարատև գործընթաց լինել: Հարցն այն է, թե արդյոք Հայաստանը, կամ Ադրբեջանը ցանկանում են գնալ դեպի լուծում, ինչն էլ նշանակում է, որ պետք է բանավեճեր և երկխոսություններ լինեն հենց ձեր երկրի ներսում»:
Անդրադառնալով հայ-ադրբեջանական շփման գծում հրադադարի ռեժիմի խախտումներին և այն հանգամանքին, թե արդյոք հնարավոր կլինի Աստանայում գալ համաձայնության դիպուկահարներին առաջին գծից հեռացնելու առնչությամբ, Գորան Լենմարկերը ասաց. «Ես չգիտեմ, թե Աստանայում ինչ կլինի: Սակայն փաստ է, որ սա սառեցված հակամարտություն չէ. այն տարեկան մոտ 20-30 կյանք է խլում: Դրա համար պետք է պարզապես հասկանալ, որ խաղաղ կարգավորումը խաղաղ պետք է լինի և առանց հրաձգությունների ու ռազմական գործողությունների»:
Ադրբեջանն անընդհատ հայտարարում է, թե իր տարածքային ամբողջականության խնդիրը կարող է լուծել նաև ռազմական ճանապարհով: Հարցին, թե եթե սկսվեն ռազմական գործողությունները, ինչպիսին կլինի միջազգային հանրության արձագանքը, Լենմարկերը պատասխանեց. «Ամբողջ բանակցային գործընթացը հենց նրա համար է, որ չհանգենք պատերազմի, լուծումը խաղաղ ընթանա: Մինսկի խմբի գործունեությունը հենց նրա համար է, որ լուծումը տրվի խաղաղ ճանապարհով: Իհարկե, պատերազմը կատաստրոֆիկ կլինի, և ես չեմ կարծում, որ դա իրատեսական տարբերակ է»: