Նախորդ տարին դժոխային էր բոլորիս համար: Մենք կորցրինք մոտ 4000 հայրենակից, ունեցանք ծանր արդյունքներով պատերազմ, համաճարակ, ինչպես նաև քաղաքական ճգնաժամ: Հիմա էլ շարունակում է մեր հայրենիքը վտանգի տակ մնալ: Այս մասին ԱԺ նիստին ասաց ՔՊ պատգամավոր Ռուբեն Ռուբինյանը՝ արձանագրելով, որ վտանգված է մեր տարածքային ամբողջականությունն ու Արցախը.
«Այս պայմաններում մենք ունենք երկու ընտրություն՝ կա՛մ շարունակաբար մեղադրել իրար, մտնել ինքնաոչնչացման փուլ, մեր հայրենակիցների արյունը և թշնամու հարձակումները դարձնել քաղաքական կապիտալ, կամ հնարավորինս հանդուրժող իրավիճակում փորձել վերլուծել և հասկանալ մեր 30-ամյա սխալները, ինչպես նաև ծավալել ծրագրային քննարկումներ՝ մեր երկրի ապագայի վերաբերյալ և ցույց տալ, որ հայ ժողովուրդը չի հանձնվել և պաշտպանելու է իր ինքնիշխանությունը, տարածքային ամբողջականությունը, այդ թվում՝ քաղաքական, դիվանագիտական ճանապարհներով»,-ասաց Ռուբինյանը: