Երևանի քաղաքապետ Կարեն Կարապետյանի հրավիրած հերթական աշխատանքային խորհրդակցության ժամանակ ամփոփվել են հուլիս ամսին մայրաքաղաքի վարչական շրջանների կողմից քաղաքային տնտեսության տարբեր ոլորտներում կատարված աշխատանքների վերլուծության արդյունքներն ու գնահատականները:
Քաղաքապետը, հիշեցնելով, որ վարչական շրջաններ կատարած աշխատանքային շրջայցերի ժամանակ տրվել են կոնկրետ հանձնարարականներ, ինչպես նաև բնակիչների կողմից բարձրացված հարցերի վերաբերյալ տարբեր խոստումներ, հանձնարարել է հետևողական լինել և հնարավոր կարճ ժամկետում լուծում տալ:
Հատուկ ուշադրություն հրավիրելով ֆինանսական մուտքերի վրա` քաղաքապետը հանձնարարել է հետևողական աշխատանք իրականացնել հավաքագրման ցուցանիշներն ապահովելու մասով. «Ապառիկ ունեցող բոլոր տնտեսվարողները պարտավոր են կատարել վճարումները, այլապես հարցը կլուծվի դատական կարգով»,- շեշտել է քաղաքապետը:
Անդրադառնալով կրպակների ապամոնտաժման խնդրին, Կարեն Կարապետյանը հանձնարարել է մինչև սեպտեմբեր ավարտել մայրաքաղաքի կենտրոնական և մյուս հատվածներում առկա ապօրինի և չգործող շուրջ 266 կրպակների ապամոնտաժումը. «Այդ կրպակներում աշխատող սոցիալապես անապահով մարդկանց անպայման պետք է այլընտրանքային աշխատանք առաջարկվի և գտնվի համապատասխան լուծումներ»,- ընդգծել է քաղաքապետը:
Կարեն Կարապետյանը վարչական շրջանների ղեկավարներին հանձնարարել է հատուկ ուշադրության տակ պահել կանաչ տարածքների խնամքի և ոռոգման խնդիրները:
Վարչական շրջանների ղեկավարներին և համապատասխան բոլոր վարչություններին հանձնարարվել է ձեռնարկել բոլոր անհրաժեշտ քայլերը սեպտեմբերի 1-ը` Գիտելիքի օրը, հավուր պատշաճի դիմավորելու նպատակով. «Սոցիալապես անապահով ընտանիքների երեխաները պետք է մեր հատուկ և մշտական ուշադրության կենտրոնում լինեն»,-շեշտել է քաղաքապետը` հանձնարարելով գրենական պիտույքներով և անհրաժեշտ այլ պարագաներով ապահովել այդ երեխաներին: Հանձնարարվել է նաև լուրջ ուշադրություն դարձնել դպրոցների բակային և հարակից տարածքների բարեկարգմանն ու խնամքին.«Դրանք պետք է խնամված ու բարեկարգ լինեն ինչպես ուսումնական տարվա առաջին, այնպես էլ տարվա մյուս բոլոր օրերին»,- նշել է Կարեն Կարապետյանը:
Մեկ անգամ ևս հիշեցնելով, որ սեպտեմբերի առաջին երեք շաբաթները մայրաքաղաքում հայտարարված են համաքաղաքային շաբաթօրյակի օրեր, քաղաքապետը վարչական շրջանների ղեկավարներին և աշխատակազմի պատասխանատուներին հանձնարարել է պատշաճ իրազեկել շահագրգիռ գերատեսչություններին , կազմակերպություններին և բնակչությանը` գործընթացն առավել զանգվածային և հասցեագրված իրականացնելու համար:
