Ինչ բանակցություն էր տեղի ունենալու Մոսկվայում, որի մասին նախապես հայտարարված չէր, սակայն Հայաստանի ՊՆ հաղորդագրությամբ տեղեկացրեց Գեղարքունիքի մարզում ադրբեջանական սադրանքից հետո: Ըստ ամենայնի, խոսքը զինվորական պատվիրակությունների մակարդակով բանակցության մասին է, եթե դրա վերաբերյալ տեղեկություն է տարածում ՊՆ, այլ ոչ թե ԱԳՆ հաղորդագրությունը: Հետևաբար հարց է, թե ինչ օրակարգով էր բանակցությունը: Ըստ էության, եթե Ադրբեջանը սպասվող բանակցությանն ընդառաջ գնում է աննախադեպ սադրանքի, ապա ավելի շուտ թերևս այն պատճառով, որ բանակցությունն այնքան էլ հաճո չէր: Հակառակ դեպքում, հատկապես երբ խոսքը մինչ այդ չբարձրաձայնված, այսինքն լայնորեն չազդարարված բանակցային քննարկման մասին էր, սադրանքի միջոցով դրա վրա աղմկոտ ուշադրություն գրավելը չի բխում որևէ տրամաբանությունից:
Մեծ հավանականությամբ բանակցությունը պետք է վերաբերեր սահմանային իրավիճակին, մասնավորապես այն հեռանկարին, որ օրեր առաջ ուրվագծում էին Հայաստանի որոշ պաշտոնյաներ: Մասնավորապես, նրանք հայտնում էին, որ մոտ ապագայում սահմանին կտեղակայվեն ռուսական սահմանապահներ, այսպես ասած բուֆերային տրամաբանությամբ, իսկ հայկական և ադրբեջանական ուժերը հետ կքաշվեն «հայելային» տրամաբանությամբ: Չի բացառվում, կամ գուցե նույնիսկ մեծ հավանականություն կա, որ Մոսկվայում բանակցությունը վերաբերելու էր հենց այդ թեմային, ինչից առաջ էլ ադրբեջանական ստորաբաժանումները գուցե փորձել են այսպես ասած բարելավել դիրքերը, առավելագույնը այդտեղ հաստատվելու, կամ էլ նվազագույնը՝ «հայելային հետքաշման» պարագայում ըստ էության հետ քաշվելով ոչ թե սեփական տարածք, այլ հետ քաշվելով Հայաստանի տարածքում և հաստատվելով Հայաստանի տարածքում, արդեն դե ֆակտո լեգիտիմ վիճակում: Հայկական զինուժը փաստորեն կանխել է ադրբեջանական այդ փորձը: Ըստ այդմ հարց է առաջանում նաև, թե այդ իրողությունը ինչ հետք, ազդեցություն է թողնելու մոսկովյան բանակցության վրա, բանակցություն լինելու է, թե ոչ՝ ընդհանրապես:
Այլ կերպ ասած, հարց է ինքնին՝ Բաքվի նպատակը այդ բանակցությունը որևէ հուն կամ ցանկալի օրակարգի դաշտ բերե՞լն էր, թե՞ այն տապալելը ընդհանրապես: Բանն այն է, որ այդ հանգամանքը նշանակալի կարող է լինել հասկանալու համար գործընթացները ավելի լայն համատեքստում: Որովհետև, հայ-ադրբեջանական սահմանային բախումները ունենալով յուրաքանչյուր սադրանքի դեպքում իրենց այսպես ասած առանձին մոտիվը, լայն իմաստով նաև Կովկասում նոր ստատուս-քվոյի հարցում ամբողջականացման և կառավարման տրամաբանության համար խորքային և բազմաշերտ պայքարի մաս են:
Լուսանկարը՝ Armeniasputnik-ի