ԵԽԽՎ հայկական պատվիրակության ղեկավար, ՀՀԿ-ական Դավիթ Հարությունյանն այսօր անդրադարձել էր ԼՂ-ի հարցով ԵԽ-ի ենթահանձնաժողովին ու հայտարարել, որ դա
հանրահայտ 1416 բանաձևի առաջարկն էր: «Մենք այն ժամանակ ենք համարել, որ դա սխալ քայլ է, նաև փորձը ցույց տվեց, որ դա սխալ քայլ է։ Երրորդ՝ մենք առ այս պահը չենք փոխել մեր դիրքորոշումը և համարում ենք նման հանձնաժողովի ստեղծումն անիմաստ»,- ասել էր նա:
Դավիթ Հարությունյանի այս հայտարարությունն ուշագրավ է այն առումով, որ ժամանակին` 2005թ., հենց ՀՀԿ ներկայացուցիչն էր կողմ քվեարկել Դեյվիդ Աթկինսոնի ներկայացրած 1416 բանաձևին: Խոսքը այն ժամանակվա պատվիրակության ղեկավար, ՀՀԿ և ԱԺ նախկին փոխնախագահ Տիգրան Թորոսյանի մասին էր:
Այն բանաձևին հայկական պատվիրակության 4 անդամներից 3-ը` Արմեն Ռուստամյանը, Շավարշ Քոչարյանը և Արտաշես Գեղամյանը դեմ էին քվեարկել, և միայն նախկին ՀՀԿ-ական Տիգրան Թորոսյանը` կողմ: ՀՅԴ ԳՄ ներկայացուցիչ, ԱԺ արտաքին հարաբերությունների մշտական հանձնաժողովի նախագահ Արմեն Ռուստամյանն այդ ենթահանձնաժողովի մասին խոսելիս և նախկինում, և հիմա ասում է, որ «փաստաթղթից նավթի հոտ է գալիս»: Իսկ Տիգրան Թորոսյանը մշտապես հակադարձել էր, թե ինքը փաստաթղթերից հոտ չի քաշում, այլ աշխատում է դրանց վրա: Եթե այսօր Դավիթ Հարությունյանը հայտարարում է, թե իրենք և՛ նախկինում, և՛ այսօր դեմ են եղել այդ բանաձևին, ապա կա՛մ տեղյակ չէ իր կուսակցության ու նրա անդամների նախկին դիրքորոշումներին, կա՛մ էլ տեղյակ լինելով՝ ստում է:
