Մոսկվայի և Անկարայի միջև Ղրիմի և Հյուսիսային Կիպրոսի հարցով «գործարքն» անիրատեսական է: «РИА Новости» գործակալության փոխանցմամբ՝ այս մասին հայտնել է դիվանագետ, Թուրքիայի խորհրդարանի պատգամավոր Օզթյուրք Յիլմազը:
Այսպես է նա մեկնաբանել Թուրքիայի Մալթեպե համալսարանի պրոֆեսոր Հասան Ունալի այն միտքը, թե Անկարան կարող է Ղրիմը ճանաչել, եթե Մոսկվան ճանաչի Հյուսիսային Կիպրոսը: Ի պատասխան սրա՝ ՌԴ նախագահի մամուլի քարտուղար Դմիտրի Պեսկովը հայտարարել էր, որ ռուսական շրջանները երբեք չեն կարող դառնալ գործարքների առարկա:
Թուրք պատգամավորը չի համաձայնել Ունալի դիտարկումների հետ՝ դրանք անվանելով տարբեր կարգավիճակներ ունեցող հարցեր: Նա նշել է, որ Ղրիմը Ռուսաստանին է միացվել՝ որպես դրա տարածքի մի մաս, իսկ Հյուսիսային Կիպրոսն անկախ պետություն է, և Թուրքիան ցանկանում է, որ այն ճանաչվի:
Այնուամենայնիվ, դիվանագետի խոսքերով՝ նման գործարքի անիրատեսականությունը չի նշանակում, որ Անկարան երբեք չի ճանաչի Ղրիմի թերակղզին Ռուսաստանի կազմում:
