Թուրքիայի արտաքին գործերի նախարարության խոսնակ Թանժու Բիլգիչը, ի պատասխան Ավստրիայի կանցլեր Սեբաստիան Կուրցի հնչեցրած հայտարարության, նշել է, որ Թուրքիան չի պատրաստվում տուժողի կարգավիճակում հայտնվել տարածաշրջանային զանգվածային միգրացիոն ճգնաժամի պատճառով, հաղորդում է Ermenihaber-ը։
Բիլգիչը գրավոր հայտարարությամբ է հանդես եկել Ավստրիայի կանցլերի այն խոսքերի առնչությամբ, որտեղ Թուրքիան մատնանշվում էր որպես լավագույն վայր աֆղանստանցի փախստականների համար։
Թուրք պաշտոնյան հայտարարության մեջ մասնավորապես նշել է. «Նախ և առաջ Թուրքիան Աֆղանստանին հարևան երկիր չէ, ինչպես հայտարարել է կանցլեր Կուրցը: Փոխանակ շեշտը դնելու համաշխարհային օրակարգում հայտնված անօրինական միգրացիայի խնդրի լուծման համատեղ ջանքերի և համագործակցության վրա՝ «ներգաղթյալները չպետք է գան այստեղ, այլ պետք է ուրիշ տեղ գնան» մակարդակի հայտարարությունները եսասիրական են և օգուտ չեն բերում ոչ մեկին»:
Թանժու Բիլգիչը շեշտել է նաև, որ Թուրքիան չի պատրաստվում իր վրա վերցնել տարածաշրջանային զանգվածային միգրացիաների հետևանքների պատասխանատվությունը։ Ըստ նրա ձևակերպման՝ Թուրքիան Եվրամիության սահմանների պահնորդը չէ։