Քենիայի Նանյուկի քաղաքի լոբբիստների խումբը և գրեթե հազար տեղացի բնակիչ դատական հայց են ներկայացրել բրիտանական բանակի դեմ զորավարժությունների ընթացքում արգելոցում տեղի ունեցած ավերիչ հրդեհի պատճառով, գրում է Газета պարբերականը:
Մարտին բրիտանական զորավարժություններն ավարտվել էին Քենիայի Լոլդայգա Հիլզ արգելոցում բռնկված լայնամասշտաբ հրդեհով. մասնագիտացված ծառայությունները երկար ժամանակ չէին կարողանում մարել կրակը: Հրդեհի պաշտոնական պատճառը չի հաղորդվում: Դրանից մեկ ամիս առաջ, Նանյուկիից 8 կիլոմետր հեռավորության վրա բրիտանական ավիաբազայում տեղի էր ունեցել նոր շտաբի և ուսումնական կենտրոնի բացումը:
Տեղի բնակիչները պնդում են, որ արգելոցում հրդեհի մասշտաբն աննախադեպ էր, այն տևել է առնվազն 4 օր: Նրանք նաև պնդում են, որ հրդեհից «տապակած հոտ է գալիս»՝ չնայած Վայրի բնության ծառայությունը հերքել է այն պնդումները, թե հրդեհին զոհ է գնացել մի քանի խոշոր կենդանի, այդ թվում՝ 5 փիղ:
Դատական հայցի հեղինակները բարձրաձայնել են մի քանի բողոք՝ խախտվել է մաքուր և առողջ միջավայր ունենալու իրավունքը, ինչպես նաև անվտանգ մարզումների ռազմական ստանդարտները: Բացի այդ, վայրի կենդանիները, փախչելով զորավարժությունների աղմուկից և կրակից, ներխուժել են բնակավայրեր և ոչնչացրել բերքը: Նրանք ցանկանում են, որ բրիտանական բանակը և բնապահպանական մարմինները պատասխանատվություն կրեն վնասի համար:
Բրիտանական կողմի ներկայացուցիչը հայտնել է, որ բանակը հրդեհի հետ կապված իր սեփական ներքին հետաքննությունն է անցկացրել, սակայն քանի որ «դա ընթացիկ դատական գործի մի մասն է, իրավիճակը մեկնաբանելը տեղին չէ»: