Տոկիոյում շարունակվող 32-րդ ամառային Օլիմպիական խաղերի առաջին հայազգի չեմպիոնը ռուսաստանաբնակ Արթուր Դալալոյանն է։ Մարմնամարզության տղամարդկանց թիմային պայքարում Ռուսաստանի ընտրանին հավաքելով 262․500 միավորով դարձավ Օլիմպիական խաղերի ոսկե մեդալակիր: Ռուսական հավաքականի կազմում ընդգրկված են Արթուր Դալալոյանը, Դենիս Աբլյազինը, Դավիդ Բելյավսկին և Նիկիտա Նագորնին: Երկրորդ տեղում Ճապոնիայի, իսկ երրորդում Չինաստանի հավաքականներն է։ Մարմնամարզիկների թիմային հաջողությունը մեծ ոգևորություն է առաջացրել Ռուսաստանում։ Հանրահայտ մարզուհի մարմնամարզության կրկնակի օլիմպիական չեմպիոն Լիդիա Իվանովան առաջարկել է արձան կանգնեցնել Արթուր Դալալոյանի պատվին:«Ես մեր պետության անունից շնորհակալություն եմ հայտնում մեր չեմպիոններին: Պարզապես հիացած եմ նրանց ելույթներից՝ Բելյավսկուց, Նագորնիից, Աբլյազինից, Դալալոյանից: Նրանք իրական հերոսներ են:Դալալոյանի պատվին պետք է արձան կանգնեցնել այն բանի համար, որ նա կարճ ժամանակում կարողացել է ապաքինվել բարդ վիրահատությունից հետո: Ահա դա է իսկական բնավորությունը և կամքի ուժը», – ասել է Իվանովան։
Իսկ ով Արթուր Դալալոյանը և որտեղից են նրա հայկական արմատները։ Դեռևս 2018 թվականին Դոհայում տեղի ունեցած աշխարհի առաջնությունում 22-ամյա Դալալոյանը հռչակվելով աշխարհի բացարձակ չեմպիոն շնորհավորանք էր ստացել Ռուսաստանի նախագահ Վլադիմիր Պուտինից։ Մեծ նվաճումից հետո Դալալոյանը ուշագրավ մանրամասներ էր ներկայացրել իր կենսագրությունից։ «Երբ մեդալ ստացա Քաթարում, ինձ զանգահարեց սպորտի նախարարը և անձամբ շնորհավորեց հաղթանակի կապակցությամբ, հետո հեռագիր եկավ նախագահ Վլադիմիր Պուտինից։ Այնուհետև ինձ հետ սկսեցին կապվել իմ բազմաթիվ ազգականները Հայաստանից։ Նրանք շատ են. տատիկս ու պապիկս ողջ են, նրանք հպարտանում են իմ հաջողություններով։ Հայրս ծնունդով Կալինինո ավանից է, որը հիմա կոչվում է Տաշիր։ Ինձ համար շատ հաճելի էր։ Զանգահարեցին նաև ազգականներս Մոլդովայից։ Ծնվել եմ Մոլդովայում՝ Տիրասպոլում, որտեղ աշխատում էր հայրս։ Այնտեղ նա ծանոթացել է մոլդավուհի մորս հետ, նրանք ամուսնացել են, և լույս աշխարհ ենք ես ու եղբայրս։ Այնուհետև ծնողներս որոշել են տեղափոխվել Ռուսաստան։ Մեզ մանկուց հայրս և շրջապատում բոլորն ասել են, որ եթե հայրս հայ է, ուրեմն դուք՝ նրա երեխաները, հայ եք։
Իհարկե, ես կարող եմ ինձ հայ անվանել։ Բայց կարող եմ նաև ինձ անվանել մոլդովացի և ռուս, չէ որ կյանքիս մեծ մասն ապրել եմ Ռուսաստանում, մեծացել և դաստիարակվել եմ Մոսկվայում։Շատ եմ ուզում լինել Հայաստանում, ծրագրում եմ ուղևորություն։ Ես շատ եմ սիրում բնություն՝ ծառեր, գետեր, ջուր, իսկ ազգականներս ասում են, որ Հայաստանում հիասքանչ, ուղղակի կուսական բնություն է։ Ես նման գեղեցկությունից հաճույք եմ և դրական լիցքեր եմ ստանում։ Չհավանեցի Քաթարը, միայն բարձրահարկեր են և չորացած հող։ Ուստի երբ գնամ Հայաստան, կվայելեմ թարմ մաքուր օդը, կանաչը, լեռները, հենց այդպիսին եմ ես պատկերացնում Հայաստանը»,- Սպուտնիկ գործակալությանը տված հարցազրույցում ասել էր Դալալոյանը։ Նշենք, որ Դալալոյանը 12 տարեկանից կապ չի պաշտպանում հոր` Հրաչի հետ։ Հարցազույցներում սակայն բազմիցս նշել է, որ շատ է ցանկանում շնոհրավորանքներ ստանալ նաև հորից։ Մանուկ հասակում Արթուր Դալալոյանը խոսել է հայերեն, սակայն հիմա հիշում է միայն որոշ բառեր։
Նշենք, որ հայազգի մարզիկը Ռուսաստանի հավաքականի կազմում թիմային մրցումներում աշխարհի չեմպիոն էր դարձել նաև 2019 թվականին։ Դալալոյանը համարվում է Ռուսաստանի մարմնամարզության ազգային թիմի առաջատարը։ Նշենք նաև, որ Դալալոյանը Տոկիոյում ունի հնարավորություն զարգացնելու հաջողությունը։ Բազմամարտում նա հաղթահարել է որակավորման փուլը և դուրս եկել եզրափակիչ։
