Բելառուսի նախագահ Ալեքսանդր Լուկաշենկոն հանդիպել է Բելառուսում Ադրբեջանի արտակարգ և լիազոր դեսպան Լատիֆ Գանդիլովի հետ՝ երկրում վերջինիս առաքելության ավարտի առթիվ: Բելառուսական պետական БЕЛТА գործակալության փոխանցմամբ՝ Լուկաշենկոն հայտնել է, որ երկու երկրներին հաջողվել է ոչ միայն պահպանել, այլև բազմապատկել իրենց «փայլուն» հարաբերությունները:
Անդրադառնալով Արցախյան վերջին պատերազմին՝ Լուկաշենկոն նշել է, որ Բելառուսը մտահոգվում էր «Ադրբեջանի և Հայաստանի միջև անցյալ տարի սրված հակամարտության պատճառով»: Բելառուսի ղեկավարը գովել է Ադրբեջանի նախագահին խնդրի «խաղաղ կարգավորման» հասնելու համար:
«Հիմնականում Ադրբեջանի և ձեր նախագահի դիրքորոշման շնորհիվ ձեզ հաջողվեց կայունացնել իրավիճակը և հասնել առկա խնդիրների խաղաղ կարգավորման: Իհարկե, դեպի խաղաղություն ընթացքը նոր է սկսվել: Ե՛վ հայ, և՛ ադրբեջանցի ժողովուրդը արժանի են հանգիստ, խաղաղ կյանքի»,- ասել է Լուկաշենկոն: