Հայաստանի պաշտպանության նախարարության համար պետական գաղտնիք է 2020թ. սեպտեմբերի 27-ին Ադրբեջանի կողմից Արցախում սանձազերծված պատերազմի հետևանքով զոհված, հուղարկավորված անձանց, վերջիններիս ազգային պատկանելիության, զոհվածների՝ զինծառայող, պահեստազորային, կամավոր լինելու, ինչպես նաև անհետ կորած անձանց վերաբերյալ թվային տեղեկությունները: ՊՆ-ից 47 օր է պահանջվել, որպեսզի մերժի Հետքին տրամադրել վերը նշված տեղեկությունները՝ պատճառաբանելով, թե այն պարունակում է պետական գաղտնիք, ինչպես նաև պաշտպանվում է Անձնական տվյալների պաշտպանության մասին օրենքով, իսկ պահանջվող տեղեկատվությունը գաղտնագրված է դեռևս 2015թ. պաշտպանության նախարարի հրամանով:
Ի՞նչ իրավիճակ է այս առումով Արցախում, արդյոք Արցախում նույնպես գաղտնի տեղեկատվություն է համարվում Արցախում սանձազերծված պատերազմի հետևանքով զոհված, հուղարկավորված անձանց, վերջիններիս ազգային պատկանելիության, զոհվածների՝ զինծառայող, պահեստազորային, կամավոր լինելու, ինչպես նաև անհետ կորած անձանց վերաբերյալ թվային տեղեկությունները։
Արցախի պաշտպանության, անվտանգության և օրինապահպանության հարցերի մշտական հանձնաժողովի նախագահ Սեյրան Հայրապետյանը «Առաջին լրատվական»-ի հետ զրույցում նշեց, որ ցավոտ հարցեր են, որոնց մասին խոսելը զգուշավորություն է պահանջում, եթե որևէ ավելորդ տեղեկատվություն կարող է վտանգել մեր հայրենակցի, հարազատի, զինվորի կյանքը, ապա պետք է լրատվամիջոցները առաջնորդվեն ՊՆ հայտարարությամբ։ Ըստ նրա՝ իրականում ամեն ինչ հրապարակելը ճիշտ չէ, կան ներքին հարցեր, և եթե այսօր ՊՆ-ն ասում է, որ չի կարելի այս պահին հրապարակել, ցանկալի չէ, պետք է առաջորդվել այդ տրամաբանությամբ։
«Մեր հասարակությունը ուզում է լսել այդ տեղեկատվությունը, մեկնաբանել, շոու անել, բայց սա ցավոտ հարց է, և եկեք վստահենք այդ ոլորտի արհեստավարժներին և գուցե այդ ցավոտ հարցերը լուծվեն։ Ինչպես հիշում եք, պատերազմը նոր էր ավարտվել և սոցիալական ցանցերում ով ինչ ուզում հրապարակում էր, թե այստեղ կան մարդիկ, այնտեղ կան շրջափակումից դուրս եկածներ, ինչը սխալ է։ Եթե մեր թշնամին, մեր հակառակորդը այդ հստակ փաստերով մեր ցավալի համաձայնագրի կետերը չի իրագործում անգամ գերիների մասով,մեր գերիներին չի տալիս, չի վերադարձնում իրենց ընտանիքներ, ապա այս դեպքում պետք է գիտակցենք, որ մենք գործ ունենք այնպիսի հակառակորդի հետ, որը հուշում է, որ ամեն ինչ պետք է լինի զգույշ և կշռադատված։ Լրացուցիչ զգուշությունը այս առումով չէր խանգարի»,-հավելեց Սեյրան Հայրապետյանը։
Լուսանկարը՝ Armeniasputnik-ի