Օրերս ԿԸՀ-ն որոշեց, որ ՏԻՄ ընտրությունները Հայաստանում անցկացվելու են այս տարվա հոկտեմբերի 17-ին և նոյեմբերի 14-ին։ Ընտրություններ լինելու են նաև Վանաձորում, որտեղ գործող քաղաքապետ Մամիկոն Ալսանյանը որոշել է նորից առաջադրվել։ Նա գտնում է, որ նորից պետք է առաջադրվի, քանի որ կիսատ թողած գործերը պետք է շարունակի:
Հիշեցնենք, որ 2016-ի ՏԻՄ ընտրությունների արդյունքում ձևավորված ավագանին Վանաձորի քաղաքապետ ընտրեց Մամիկոն Ասլանյանին, որն առաջադրվել էր ՀՀԿ-ից, իսկ Լուսավոր Հայաստան կուսակցության թեկնածու Քրիստ Մարուքյանը չընտրվեց:
ԼՀԿ-ն դեռ չունի որոշում՝ կմասնակցի՞ Վանաձորի ՏԻՄ ընտրություններին, թե ոչ։ Վանաձոր քաղաքի ավագանու «Լուսավոր Հայաստան» խմբակցության ղեկավար Քրիստ Մարուքյանը «Առաջին լրատվական»-ի հետ զրույցում նշեց, որ կուսակցությունը դեռ վերջնական որոշում չունի, առաջիկա երկու շաբաթների ընթացքում հստակ կլինի որոշում, կուսակցությունը հայտարարություն կտարածի։
Անդրադառնալով Մամիկոն Ասլանյանի որոշմանը, որ մտադիր է առաջադրվել այս ընտրություններին, արդյոք լուրջ ընտրապայքար կլինի՞, Մարուքյանը նշեց, որ Հայաստանում փոխվել են առաջանահերթություններ և իրավիճակ։
«Մի ժամանակ իշխանության նկատմամբ մի վերաբերմունք կար, հիմա բոլորովին այլ վերաբերմունք է, մի ժամանակ ընդդիմություն լինելն էլ մեծ պարծանք և հպարտություն, հիմա թշնամի են համարում և ընկալումները շատ շեղված են, և պարզ չէ, թե ով է ընդդիմություն, ով՝ իշխանություն, մի քիչ անհասկանալի իրավիճակ է»,-հավելեց Մարուքյանը։
Ի դեպ, մամուլը գրում է, որ չի բացառվում նախկինում ՀՀԿ-ի կողմից առաջադրված Մամիկոն Ասլանյանը հիմա էլ ՔՊ-ի կողմից առաջադրվի։ Ինքը՝ Մամիկոն Ասլանյանը, այս լուրը ո՛չ հերքում, ո՛չ հաստատում է, միայն ասում է, որ այդ առումով որևէ շոշափելի, առարկայական բան չկա։
