Հուլիսի 1-ից մեկնարկել է ՀՀ-ում գործող դատավորների վարկանիշավորման վեցերորդ ալիքը, ինչի կապակցությամբ HelpCourt համակարգը հայտարարել է հրապարակային փակ մրցույթ:
Այս պահին ամենաբարձր վարկանիշ ունեցող տղամարդ դատավորը Երևան քաղաքի ընդհանուր իրավասության դատարանի դատավոր Ավագ Գաբրիելյանն է, իսկ կին դատավորը՝ նույն ատյանի դատավոր Լիլիթ Սարգսյանը:
Մրցույթի մասնակիցներն են ՀՀ-ում գործող դատավորները: Մրցույթի կանոնների համաձայն՝ դատավորի վարկանիշը ձևավորում են փաստաբանները՝ http://helpcourt.am/ էլեկտրոնային կայքի օգնությամբ գնահատելու միջոցով:
Յուրաքանչյուր փաստաբան միևնույն դատավորին և (կամ) դատական ակտին կարող է տալ մեկ միավոր դրական կամ բացասական գնահատական: Վարկանիշավորման գործընթացը շարունակվում է և ավարտվելու է դեկտեմբերի 24-ին:
Մրցույթի արդյունքների ամփոփումից հետ երկու և ավելի դատավորների կողմից հավասար վարկանիշ ունենալու դեպքում ամենատարեց դատավորը կհամարվի առավել բարձր վարկանիշ ունեցող դատավոր:
Տարվա ամենաբարձր վարկանիշ ունեցող դատավորին փոխանցվելու է «Թափանցիկ ձեռք 2021» հուշանվերը: Համակարգը գերթափանցիկ է, և յուրաքանչյուր ոք կարող է, այցելելով https://helpcourt.am/ կայք, տեղեկանալ, թե որ դատավորին որ փաստաբանը ինչպես և երբ է գնահատել: