Տոկիոյում շարունակվող օլիմպիական խաղերում Հայաստանի հավաքականը երկրորդ կորուստը կրեց։ Ձյուդոյի մրցաշարի 73 կգ քաշային կարգի մեկնարկային գոտեմարտում Ֆերդինանդ Կարապետյանը մրցեց Ղազախաստանի ներակացուցչի` Ժանսայ Սմագուլովի հետ և պարտվելով որակավորման փուլում դուրս մնալով հետագա պայքարից: Նշենք, որ Կարապետյանից սպասելիքները մեծ էին և նա համարվում էր մրցանակային տեղերի հավակնորդ։ Հիշեցնենք, որ երեկ պայքարից դուրս էր մնացել հրաձիգ Էլմիրա Կարապետյանը։ Վերջինս 573 միավոր զբաղեցրել էր 18 հորիզոնականը։ Էլմիրա Կարապետյանը մեր ամենահեռանկարային մարզիկներից է և նրա ցույց տված արդյունքը կարելի է նաև գոհացնող համարել։ Վաղը մրցասպարեզ դուրս կգա բռնցքամարտիկ Կորյուն Սողոմոնյանը: Բռնցքամարտիկների մրցաշարը կմեկնարկի Երևանի ժամանակով 06:00-ին, Սողոմոնյանը կսկսի պայքարը Երևանի ժամանակով 12:15-ին: Հուլիսի 27-ին ծանրամարտի կանանց 59 կգ քաշային կարգի B ենթախմբում իր ուժերը կչափի Իզաբելլա Յայլյանը:
Նույն օրը տղամարդկանց 100 մետր ազատ ոճում կմեկնարկի նաև լողորդ Արթուր Բարսեղյանը: Այս մրցումը կսկսվի Երևանի ժամանակով 14:00-ից: Նշենք, որ Յալյանից և Բարսեղյանից սպասելիքներն այնքան էլ մեծ չեն։ Ավելի ճիշտ այս երկու մարզիկները չեն դասվում մրցանակային տեղերի հավակնորդների շարքում։ Մինչ այս պահը Հայաստանի օլիմպիական հավաքականի 17 անդամներից ասպարեզ են դուրս եկել 4-ը։ Մարմնամարզիկ Արթուր Դավթյանը հենացատկի մրցումներում փայլուն ելութով հաղթահարելով որակավորման փուլի արգելքը օգոստոսի 2-ին կպայքարի մեդալների համար։ «Լավ ելույթ ստացվեց և կարևորն այն է, որ եզրափակիչում եմ: Բավականին բարձր գնահատականով եմ դուրս եկել եզրափակիչ: Առաջին ցատկի ժամանակ քայլ կարատեցի, իսկ երկրորդ ցատկն շատ լավ ստացվեց: Նժույգ թափերի Եվրոպայի առաջնության հետ համեմատած այստեղ շատ բարդ էր, քանի որ Չինաստանի և Ճապոնիայի ներկայացուցիչները կան: Կարևորն այն է, որ ես իմ անելիքն արեցի: Հենացատկում ստացվեց այնպես, որ առաջատար մարզիկներից շատերն անգամ դուրս չեկան եզրափակիչ, ինչպես Հոնգկոնգի ներկայացուցիչը: Չեմ կարող ասել, թե ինչն է խնդիրը, գուցե Օլիմպիական խաղերի առանձնահատկությունը, հուզմունքը կա: Նախորդ խաղերի փորձը, տրամադրվածությունն օգնում են այս խաղերում»,- ամփոփելով որակավորման փուլում իև ելույյթն ասել է Դավթյանը։ Եզրափակիչ մրցումներին ընդառաջ կարող ենք ասել, որ Արթուր Դավթայնը ունի իրական հնարավորություն պատմական հաջողություն գրանցելու։
Անկախ Հայաստանը մարմնամարզությունում օլիմպիական որևէ մեդալ չունի։ Բռնցքամարտի մրցաշարում Հովհաննես Բաչկովը հաղթանակ տանելով 1/16-րդ եզրափակչում հուլիսի 31-ին 1/8-րդ եզրափակչում կմրցի ադրբեջանցի Ջավիդ Չելեբիևի հետ։ Վերջինս Ադրբեջանի հավաքականի ամենափորձառու բռնցքամարտիկներից է։ 29-ամյա ադրբեջանցին 2013 թվականին դարձել է աշխարհի չեմպիոն։ 1/16-րդ եզրափակչում Չելեբիև պայքարից դուրս է թողնել Ուկրաինայի ներկայացուցիչ Յարոսլավ Խարցիզին։ Ինչևէ, Օլիմպիադայի երրորդ խաղարկային օրվանից հետո արդեն իսկ ուրվագծվում են առաջատարները մեդալների ընդհանուր հաշվարկում։ Մասնավորապես այս պահին մեդալների հաշվարկի առաջատարը ԱՄՆ-ն է 7 ոսկե, 3 արծաթե, 4 բրոնզե մեդալով : Երկրորդը՝ Չինաստանն է` 6 ոսկե, 3 արծաթե, 6 բրոնզե մեդալով և եռյակը եզրափակում է Ճապոնիայի թիմը 6 ոսկե, 1 արծաթե 2 բրոնզե մեդալներով: Ռուսաստանից մարզիկները, որոնց արգելված է ելույթ ունենալ իրենց պետության դրոշի ներքո 1 ոսկե, 4 արծաթե և 3 բրոնզե մեդալներով 7-րդն են։
Այս պահին Օլիմպիադայում մեդալներ են նվաճել 40 երկրներ։ Մեր հարևան պետություններից մեդալ ունեն Թուրքիան Վրաստանը և Իրանը։ Վերջինս ունի մեկ ոսկե, Վրաստանը՝ մեկ արծաթե, իսկ Թուրքիան՝ 2 բրոնզե մեդալ։ Նշենք, որ մեդալների մեր հիմնական հավակնորդները դեռևս ասպարեզ դուրս չեն եկել։ Խոսքը վերաբերվում է Օլիմպիական չեմպիոն Արթուր Ալեքսանյանին, աշխարհի չեմպիոն Սիմոն Մարտիրոսյանին, Եվրոպայի չեմպիոններ Արսեն Հարությունյանին և Վազգեն Թևանյանին։