Անցած շաբաթ՝ հուլիսի 17-23-ը, ԱՄՆ ոստիկանությունը հրազենի կիրառմամբ 915 դեպք է արձանագրել։ Այս մասին հայտնում է NBC News հեռուստաալիքը՝ հղում անելով Gun Violence Archive կազմակերպությանը։
Այսպիսով, ԱՄՆ-ում հրազենի գործադրմամբ հանցագործություններ են տեղի ունեցել յուրաքանչյուր 12 րոպեն մեկ։ Այդ միջադեպերի հետևանքով զոհվել է առնվազն 430 մարդ, վիրավորվել՝ 1007-ը։
Նշվում է, որ 2020 թվականին ԱՄՆ-ում հրազենային վնասվածքների հետևանքով զոհվել է 43 հազար մարդ։ 2021-ին արդեն իսկ գրանցվել է ավելի քան 25 հազար մահվան ելք։
Կազմակերպության գնահատմամբ՝ ԱՄՆ-ում 2018 թվականի վերջի տվյալներով՝ քաղաքացիների ձեռքին եղել է 393 մլն միավոր զենք։
Միայն անցած տարի ԱՄՆ բնակիչները գնել են ռեկորդային քանակի զենք։ Մարտից օգոստոս ընկած հատվածում 5 մլն մարդ ձեռք է բերել իր առաջին զենքը։ Առավել ակտիվ գնորդները եղել են սևամորթ ամերիկացիները։ Նրանց շրջանում զենք ունեցողների թիվն աճել է 58․2 տոկոսով։
