Ո՞ր ըմպելիքներն ավելի լավ կհագեցնեն ծարավը շոգին, և որոնք, ընդհակառակը՝ ավելի շատ խմելու ցանկություն կառաջացնեն: РИА Новости գործակալության փոխանցմամբ՝ այս մասին Sputnik ռադիոյին տված հարցազրույցում ասել է բժշկական գիտությունների թեկնածու, սննդաբան, Սանկտ Պետերբուրգի պետական համալսարանի բժշկական ֆակուլտետի դոցենտ Անդրեյ Բոբրովսկին:
Լավագույն ըմպելիքը, որը օրգանիզմը կապահովի անհրաժեշտ քանակության հեղուկով, անկասկած, սովորական ջուրն է, ասել է սննդաբանը: Նա խորհուրդ է տվել, թե ինչպես ջրին հատուկ համ հաղորդել. դրա համար բավական է ջրով բաժակին կամ սափորին ավելացնել նարինջ, կիտրոն կամ որևէ այլ միրգ:
Բոբրովսկին ընդգծել է, որ ծարավը հագեցնելու համար հարկավոր է ընտրել ոչ քաղցր ըմպելիքներ: Նույնիսկ կվասը՝ ռուսական ավանդական ըմպելիքը, որը սովորաբար խմում են շոգին, պետք է ընտրել շաքարի ցածր պարունակությամբ:
Իսկ տարածված քաղցր գազավորված ըմպելիքներից շոգ եղանակին հարկավոր է լիովին հրաժարվել, քանի որ դրանք մեծ մասամբ շատ կալորիական են: Բժիշկը հավելել է, որ նաև բավականին դժվար է վերահսկել խմած գազավորված ըմպելիքների քանակությունը, և դրանք հաճախ ավելի շատ են խմում, քանի նախատեսում էին:
Սննդաբանն ընդգծել է, որ թեկուզ ցածր կալորիականության գազավորված ըմպելիքները, որոնք, գուցե, շատ չեն ազդում քաշի ավելացման վրա, այնուամենայնիվ, ծարավը հագեցնելու զգացողություն չեն առաջացնում, և մարդը կրկին ինչ-որ բան է ուզում: Նա հավելել է, որ դա վերաբերվում է նաև փաթեթավորված հյութերին: Ըստ մասնագետի, դրանց և գազավորված ըմպելիքների միջև «տարբերություն չկա. օգուտը նվազագույնն է, իսկ վնասը, ցավոք, նույնը»: