8-րդ գումարման Ազգային ժողովի աշխատանքների մեկնարկից առաջ անվտանգության միջոցառումներ են ձեռնարկվում խորհրդարանում։ Օրեր առաջ տեղադրվել են մետաղաորսիչ սարքեր, որոնց միջոցով այսուհետ պետք է անցնեն բոլոր պատգամավորները ԱԺ նիստերի դահլիճ մուտք գործելիս։ Ցանկացած կասկածելի իրի հայտնաբերման դեպքում սարքն ազդանշան է արձակելու։
Հոկտեմբերի 27-ի իրավահաջորդների նախկին ներկայացուցիչ Լևոն Եղիազարյանը «Առաջին լրատվական»-ի հետ զրուցյում ասաց, որ ողջունում է իշխանության զգուշավորությունը, որովհետև Ազգային ժողով են մտնում այն քաղաքական ուժերը, որոնց ղեկավարների ժամանակ եղել է հոկտեմբերի 27 նույն դահլիճում։ «Շատ կարևոր է, որ այսօր ձեռք առնվեն որոշակի անվտանգության միջոցառումներ նոր հոկտեմբերի 27-երի ականատես չլինելու համար։ Նախընտրական քարոզարշավի ժամանակ հոկտեմբերի 27-ին ազգային անվտանգության նախարար Սերժ Սարգսյանն ասում էր՝ մորթելու եմ։ Այդ նույն բառն օգտագործում էր նաև Նաիրի Հունանյանը, երբ հոկտեմբերի 27-ին նախորդող ամռանը հանդիպում էր առանձին կուսակցության ղեկավարների հետ և բառացիորեն ասում էր նույնը։ Ազգային ժողով մտած ուժերից ամեն ինչ սպասելի է»,-ասաց Եղիազարյանը՝ հավելելով, որ վերջիվերջո Ազգային ժողով է մտնում մի ուժ, որի ղեկավարը դուելի էր հրավիրում հանրապետության վարչապետին։ Բացի դա՝ խմբակցության մեջ գտնվում են դաշնակցականներ, իսկ բոլորը շատ լավ հիշում են, որ Նաիրի Հունանյանը նախկին դաշնակցական էր, այդ խմբից 5-ից 4-ը դաշնակցականներ էին։ «Պատահական չէ, որ Նաիրի Հունանյանը հոկտեմբերի 27-ի սպանդը կազմակերպելուց հետո առաջինը զանգահարում է դաշնակցական Հրանտ Մարգարյանին, դաշնակցական Տիգրան Նաղդալյանին, դաշնակցական Ժիրայր Սեֆիլյանին։ Այսօր դատավարություն կա, որով անցնում է Հայրենիքի փրկության շարժման վարչապետի թեկնածու Վազգեն Մանուկյանը, ով ասում է, թե պետք է կայծակնային վերցնել իշխանությունը։ Իշխան Սաղաթելյանը, մյուսները իրենց հարցազրույցներում չեն էլ թաքցնում իրենց նպատակը՝ իշխանությունը զավթել։ Դրա մասին էր նաև Վանեցյանի վերջին հարցազրույցը։ Այս ամենը պատահական չէ։
Պատահական չէ նաև այն, որ նրանք արդեն մի քանի ամիս է՝ իրենց լրատվամիջոցներով թմբկահարում են, թե Նիկոլ Փաշինյանը ուժեղացված անվտանգությամբ է շրջում և այլն։ Նրանց նպատակները պարզ են։ Դրա համար ես ողջունում եմ, որ անվտանգության միջոցառումներ են ձեռք առնվում»,-ասաց Եղիազարյանը՝ ավելացնելով, որ եթե 1999 թվականին Վազգեն Սարգսյանը և Կարեն Դեմիրճյանը իրենց անվտանգության աշխատակիցներին պահեին իրենց մոտ՝ Ազգային ժողովում, այլ ոչ թե դրսում կանգնած լինեին նրանք, ապա Վազգեն Սարգսյանն ու Դեմիրճյանը հնարավոր է ողջ լինեին։ «Կրկնում եմ, ես լիարժեքորեն իրատեսական եմ համարում հոկտեմբերի 27-ի կրկնությունը։ Եթե երեկ հանրապետության նախկին նախագահը այս ծանր ճգնաժամային իրավիճակում հավաքում է լրագրողներին և բամբասում է իշխանություններից, ապա նրանք ամեն ինչի ընդունակ են։ Նրանք ոչ մի պատասխանատվություն չունեն հայրենիքի նկատմամբ։ Այս երկրը, հայրենիքը նրանց համար տարածքներ են ասպատակելու, գողանալու, կեղծելու, սպանելու»,-եզրափակեց Եղիազարյանը։