«Առաջին լրատվական»-ի զրուցակիցն է իսրայելցի հայտնի հրապարակախոս, քաղաքագետ Ավիգդոր Էսկինը։
-Պարոն Էսկին, ինչպե՞ս եք գնահատում իրավիճակը հայ-ադրբեջանական սահմանին: Հնարավո՞ր եք համարում լայնածավալ պատերազմական գործողությունների վերսկսումը։
-Հայաստանի և Ադրբեջանի միջև սահմանազատում դեռևս չի իրականացվել։ Հիմա Բաքուն իրեն ուժեղ է զգում և փորձում է Հայաստանին փաստի առաջ կանգնեցնել, բայց դրա փոխարեն անհրաժեշտ են կառուցողական բանակցություններ: Այսպես թե այնպես, կողմերը նստելու են բանակցությունների սեղանի շուրջ: Միևնույն ժամանակ, մենք ականատես ենք լինում Բաքվի փորձերին ՝ սկսելու բանակցային գործընթացը ուժեղի դիրքերից: Բայց դա չի նշանակում, որ լայնամասշտաբ պատերազմ է սպասվում: Ադրբեջանը չի կարող իրեն թույլ տալ ուղղակի ագրեսիա ինքնիշխան Հայաստանի դեմ՝ ելնելով միջազգային պրակտիկայից և ՀԱՊԿ-ին Հայաստանի անդամակցության փաստից:
-Ինչո՞ւ է պետք Ալիևին սրացումը, դա կապվա՞ծ էր նրա Մոսկվա կատարած այցի հետ:
-Սա փորձ է ցույց տալ վճռականություն բանակցությունների մեկնարկից առաջ և ցուցադրել կոշտ քաղաքականություն վարելու նրանց մտադրությունները: Դա չպետք է կապել Մոսկվա կատարած այցի հետ: Խոսքը Ալիևի հետպատերազմյան ընդհանուր ռազմավարության մասին է:
-Նոյեմբերի 9-ի համաձայնագրից հետո ինչո՞ւ հնարավոր չէ խաղաղության հասնել տարածաշրջանում, էլ ի՞նչ է ուզում Թուրքիան Ադրբեջանի ձեռքերով:
–Բոլորը սպասում էին Հայաստանում ընտրությունների արդյունքներին: Բանակցությունների ճանապարհն այժմ բաց է: Կարգավորման համաձայնության հասնելը բխում է ոչ միայն Հայաստանի շահերից: Խաղաղության կարիք ունի նաև Ադրբեջանը, որը միջազգային հանրության առջև գտնվում է բարդ իրավիճակում: Թուրքիան ազդում է Ալիևի վրա, բայց այս հարցում վերջնական ռազմավարությունը որոշվում է Բաքվում, այլ ոչ թե Անկարայում։