Լեհաստանը և Ուկրաինան դատապարտել են Վաշինգտոնի և Բեռլինի միջև ձեռք բերված համաձայնությունը «Հյուսիսային հոսք-2» գազատարի շուրջ, հաղորդում է BBC-ի ռուսական ծառայությունը: Երկու երկրների համատեղ հայտարարության մեջ նշվում է, որ այդ որոշումը լրացուցիչ քաղաքական, ռազմական և էներգետիկ սպառնալիքներ է պարունակում Ուկրաինայի և ընդհանրապես Կենտրոնական Եվրոպայի համար և մեծացնում է Ռուսաստանի հնարավորությունները՝ ապակայունացնող ազդեցություն ունենալ Եվրոպայում:
ԱՄՆ-ն և Գերմանիան համաձայնության են եկել «Հյուսիսային հոսք-2» գազատարի շուրջ: Վաշինգտոնը հրաժարվել է գազատարի շինարարության պատճառով Գերմանիայի հանդեպ պատժամիջոցներից: Միևնույն ժամանակ ԱՄՆ պետքարտուղարության խոսնակ Նեդ Փրայսը նշել է, որ Վաշինգտոնը նախկինի նման դեմ է գազատարի կառուցմանը, որի շինարարության 98 տոկոսն, ի դեպ, արդեն ավարտված է:
Գերմանիան էլ իր հերթին կաջակցի ԱՄՆ-ի փորձերին՝ ևս 10 տարով երկարաձգել ռուսական գազի տարանցումը Ուկրաինայով: Բեռլինը նաև խոստացել է Ռուսաստանի դեմ պատժամիջոցներ նախաձեռնել, եթե Մոսկվան Կիևի նկատմամբ ագրեսիվ գործողությունների դիմի: Բացի այդ, Գերմանիան տեխնիկական աջակցություն կցուցաբերի Ուկրաինային էներգետիկ ոլորտի բարեփոխումների և գազամատակարարման համակարգերի արդիականացման հարցում: